Mangipakita iti Personal nga Interes—Babaen ti Panagsaludsod ken Panagimdeng
1 Kaay-ayo ti kaaduan a tattao nga iyebkas ti kapanunotanda ngem dida kayat ti masermonan wenno mapalutpot. Ngarud, kas Kristiano a ministro, nasken a sursuruentayo no kasano ti agsaludsod iti wagas a matignay dagiti tattao a mangyebkas iti kapanunotanda.—Prov. 20:5.
2 Mamagpanunot koma dagiti saludsodtayo, saan a mangkarkarit. Iti panangasabana iti binalaybalay, isaludsod no kua ti maysa a kabsat, “Iti panagkunayo, dumtengto ngata ti tiempo a tratuen dagiti tattao ti maysa ken maysa buyogen ti dignidad ken panagraem?” Depende iti sungbat, pasarunsonanna ti saludsodna iti kastoy, “Ania ti pagarupenyo a kasapulan tapno matungpal daytoy?” wenno “Apay a kasta ti panagriknayo?” Iti panangasabana iti di pormal a pamay-an ken kadagiti publiko a lugar, kastoy ti isaludsod ti sabali pay a kabsat kadagidiay addaan iti annak, “Ania ti kaay-ayoyo unay kas maysa a nagannak?” Sa isaludsodna, “Ania dagiti kangrunaan a pakaseknanyo?” Paliiwenyo ta dagitoy a saludsod palubosanna dagiti tattao a mangyebkas a siwawaya iti kapanunotanda. Gapu ta nagduduma ti kasasaad, mabalin a nasken a baliwantayo ti topiko ken ti pamay-an ti panagsaludsodtayo tapno maibagay kadagiti tattao iti teritoriatayo.
3 Panangammo iti Kapanunotan Dagiti Tattao: No kayat dagiti tattao nga iyebkas ti kapanunotanda, umimdengkayo a siaanus a saan a sumampitaw no di kasapulan. (Sant. 1:19) Pagyamananyo dagiti komentoda. (Col. 4:6) Mabalinyo a kunaen: “Makapainteres dayta. Pagyamanan iti panangiranudyo kaniak.” No kabaelanyo nga aramiden a sipapasnek, komendaranyo ida. Sidadayaw nga agsaludsodkayo pay tapno maammuanyo ti pampanunoten ken ti kaririknada. Mangbirokkayo iti banag a pagtunosanyo. No kayatyo nga iturong ti atensionda iti kasuratan, mabalinyo a kunaen, “Pinampanunotyo kadin daytoy?” Liklikanyo ti agbalin a dogmatiko wenno mannakisupiat.—2 Tim. 2:24, 25.
4 Ti reaksion dagiti sabsabali kadagiti saludsodtayo ket mabalin nga agpannuray unay iti panagimdengtayo. Ammo dagiti tattao no naimpusuan ti panagimdengtayo. Kinuna ti maysa nga agdaldaliasat a manangaywan, “No siaanus ken sidadaanka a dumngeg kadagiti tattao, addaan dayta iti nakaskasdaaw a bileg a mangguyugoy ken nakasaysayaat dayta nga ebkas ti nabara a personal nga interes.” Ipakpakitatayo nga adda panagraemtayo kadagiti sabsabali no imdengantayo ida, ken mabalin a dayta ti mangtignay kadakuada a dumngeg iti naimbag a damag nga ikagkagumaantayo nga iranud.—Roma 12:10.