Isuroyo Dagiti Naemma a Magna iti Dalan ti Dios
1. Ania ti ramanen ti panagaramid iti adalan?
1 Natukoy dagiti adalan ni Kristo idi umuna a siglo kas kameng “Ti Dalan.” (Ara. 9:2) Ti pudno a Kinakristiano ramanenna ti intero a wagas ti panagbiag. (Prov. 3:5, 6) Gapuna, no mangyadaltayo iti Biblia saan nga umdas ti basta panangiranud laeng iti umiso a pannakaammo maipapan iti doktrina ti Biblia. Nasken a tulongantayo met dagiti iyad-adalantayo iti Biblia a magna iti dalan ni Jehova.—Sal. 25:8, 9.
2. Ania ti mangtignay iti iyad-adalan iti Biblia nga agtungpal kadagiti bilin ti Dios?
2 Ayat ken Jehova ken ni Jesus: Anian a makakarit kadagiti imperpekto a tattao nga itunos ti panunot, kababalin, panagsasao, ken konduktada iti pagayatan ti Dios! (Roma 7:21-23; Efe. 4:22-24) Nupay kasta, matignay dagiti naemma a mangaramid iti dayta gapu iti ayatda iti Dios ken ti Anakna. (Juan 14:15; 1 Juan 5:3) Kasanotayo a matulongan dagiti iyad-adalantayo iti Biblia a mangpatanor iti dayta nga ayat?
3. Kasanotayo a matulongan dagiti iyad-adalantayo a mangpatanor iti ayat ken Jehova ken ni Jesus?
3 Tulonganyo ti iyad-adalanyo a mangammo no ania a kita a persona ni Jehova. Inlawlawag ti maysa a kabsat a lalaki, “Saan nga ayaten dagiti tattao ti dida am-ammo, isu nga iti damo pay laeng a panagadal, isurok kadagiti iyad-adalak ti nagan ti Dios manipud iti Biblia, ken mangbirokak kadagiti gundaway a mangipaganetget kadagiti galad ni Jehova.” Ti nagsayaat a pamay-an a panangaramid iti daytoy isu ti panangitampok iti ulidan ni Jesus. (Juan 1:14; 14:9) Malaksid iti dayta, usarenyo dagiti saludsod iti kahon a pangrepaso iti ngudo ti tunggal kapitulo ti libro nga Isursuro ti Biblia tapno tulongan ti iyad-adalanyo a mangutob kadagiti nakaskasdaaw a galad ti Dios ken ti Anakna.
4. (a) Apay a ti panangasaba ket maysa a karit para kadagiti adu a mayad-adalan? (b) Kasanotayo a matulongan dagiti iyad-adalantayo a mangirugi iti Nakristianuan a ministerio?
4 Mangisuro Babaen ti Ulidan: Kas mannursuro ken mangidaldalan, maipakitatayo kadagiti sabsabali no kasano ti magna iti dalan ti Dios babaen ti tigtignaytayo. (1 Cor. 11:1) Kas pagarigan, kaaduan nga iyad-adalan iti Biblia ti saan a naruam nga umasideg kadagiti ganggannaet tapno iranudda dagiti patpatienda. Gapuna, nasken ti kinaanus ken kinasigo tapno matulongan ida a mangpatanor iti ayat, pammati, ken tured a kasapulan iti pannakiraman iti trabaho a panangasaba ken panagaramid kadagiti adalan. (2 Cor. 4:13; 1 Tes. 2:2) Ti tarigagaytayo a mangiwanwan kadagiti iyad-adalantayo tignayennatay a mangkadua ken mangsuporta kadakuada no irugidan ti makiraman iti Nakristianuan a ministerio.
5. Kasano a ti nasayaat nga ulidan tulonganna dagiti mayad-adalan a mangilasin no ania ti ramanen ti panangtungpal kadagiti bilin ti Dios?
5 Adda pay sabali a napateg nga aspeto ti Nakristianuan a panagbiag a mabalin a masursuro dagiti iyad-adalanyo babaen ti ulidanyo. No bisitaenyo ti maysa a masakit wenno komustaenyo ti dadduma kadagiti gimong ti kongregasion, makitada ti ayatyo. (Juan 15:12) No makiramankayo iti panagdalus iti Kingdom Hall wenno tulonganyo dagiti sabsabali, isursuroyo kadakuada no kasano ti agserbi. (Juan 13:12-15) No makitada a tagtaginayonenyo ti simple nga estilo ti panagbiag, matarusanda ti kaipapanan ti ‘panangitultuloy a panangsapul nga umuna ti pagarian’—Mat. 6:33.
6. Ania ti ibunga ti panangtulong kadagiti naemma nga agserbi ken ni Jehova?
6 Adu a panagregget ti ramanen ti trabaho a panangisuro kadagiti sabsabali maipapan iti Sao ti Dios ken ti panagaramid kadagiti adalan. Ngem anian a rag-o ti itden ti pannakakita kadagiti naemma nga ‘agtultuloy a magna iti kinapudno’!—3 Juan 4.