Agdamdamagkayo Kadi No Siasino Pay Dagiti Mayat a Mayadalan?

No adda iyad-adalanyo iti Biblia, apay a diyo saludsoden no adda gayyem, kabagian, wenno am-ammona a mayat met a mangadal iti isursuro ti Biblia? Masansan nga adu ti mainagananna. No ipalubos ti estudiante mabalinyo a dakamaten ti naganna no sarungkaranyo daydiay nga indibidual tapno itukonyo ti panagadal iti Biblia. Mabalinyo a kunaen, “Agad-adal ni [nagan ti estudiante] iti Biblia, ket patienna a kayatmo met ti magunggonaan iti libre a panagadal iti Biblia.” Kalpasanna, idemostrayo iti apagbiit no kasano a maikonkondukta ti panagadal nga usarenyo ti libro nga Isursuro ti Biblia.

No adda iyad-adalanyo a nasayaat ti panagrang-ayna, mabalinyo a paregtaen nga ilawlawagna no kasano ti panagadal kadagiti gagayyem ken kameng ti pamiliana a nalabit interesado. Mabalinna nga awisen ida a makipagadal. Ngem no saan a kombeniente, mabalinna nga iyurnos ti pannakisaritayo kadakuada tapno maidemostrayo ti panagadal iti Biblia. Ti panangaramidyo iti daytoy paregtaenna ti estudiante a mangiranud iti pannakaammona iti Biblia kadagiti sabsabali.

Dagidiay regular a sarsarungkaranyo mabalin met a makaitedda kadagiti nagan uray no isuda a mismo ket saan pay a regular a mayad-adalan iti Biblia. No itukonyo kadakuada ti kopia ti libro nga Isursuro ti Biblia, mabalinyo nga isaludsod, “Adda kadi am-ammoyo a mayat a maaddaan iti kastoy a publikasion?”

Gapu iti kinaganat ti tiempo, kayattayo nga usaren ti amin a posible a pamay-an ti panangtulong kadagidiay a tattao a dumngeg ken umawat iti naimbag a damag. Agdamdamagkayo kadi no siasino pay dagiti mayat a mayadalan?