“Agtultuloy a Surotennak”
1 Ipampamaysa ti adu a tattao a pagustuan ti bagbagida, kaskasdi masansan a saanda a naragsak. Maisupadi iti dayta, inrekomenda ni Jesus ti wagas ti panagbiag a di agimbubukodan a mangyeg iti napaypayso a kinaragsak. (Ara. 20:35) Kinunana: “No ti asinoman kayatna ti sumurot kaniak, paglikudanna koma ti bagina . . . ket agtultuloy a surotennak.” (Mar. 8:34) Saan laeng a ti sagpaminsan a panangpaidam iti bagi iti sumagmamano a ragragsak ti ramanen daytoy. Kaipapananna nga agbiagtayo iti tunggal aldaw a mangay-ayo ken Jehova, saan a ti bagitayo.—Roma 14:8; 15:3.
2 Usigentayo ti ulidan ni apostol Pablo. Gapu “iti naringbaw a pateg ti pannakaammo ken Kristo Jesus,” insardeng ni Pablo a ragpaten dagiti personal a tarigagayna ken impamaysana ti panangyadelantar kadagiti interes ti Pagarian. (Fil. 3:7, 8) “Iti biangko,” kinunana, “siraragsakakto unay a mangbusbos ken naan-anay a mabusbos” iti panagserbi kadagiti sabsabali. (2 Cor. 12:15) Rumbeng nga isaludsod ti tunggal maysa kadatayo: ‘Kasano ti panangusarko iti tiempo, pigsa, abilidad, ken sanikuak? Dagiti laeng kadi pagimbagak ti ipampamaysak, wenno ikagkagumaak nga ay-ayuen ni Jehova?’
3 Dagiti Gundaway a Mangted: Tinawen a mangbusbusbos dagiti adipen ti Dios iti nasurok a maysa a bilion nga oras iti makaispal-biag a trabaho a panangikasaba iti Pagarian. Iti uneg ti kongregasion, ubing man wenno nataengan ket addaan iti nagduduma nga annongen a makagunggona kadagiti sabsabali. Adu pay a trabaho ti rumbeng nga aramiden mainaig kadagiti asamblea ken kombension kasta met iti panagibangon ken panangmantenir kadagiti patakder a maus-usar para iti pannakayadelantar ti pudno a panagdayaw. Panunotenyo met ti naayat a tulong nga ipapaay dagiti kakabsat nga agserserbi kadagiti Hospital Liaison Committee ken kadagiti Patient Visitation Group. Amin dagita a panagsakripisio ket maysa a bendision iti Nakristianuan a panagkakabsattayo!—Sal. 110:3.
4 Adda gundawaytayo a tumulong kadagiti sabsabali iti nadumaduma a wagas no adda tumaud a didigra wenno emerhensia. Ngem masansan a mailasintayo lattan nga agkasapulan ti padatayo a Kristiano iti tulong wenno pammaregta. (Prov. 17:17) No sisasaganatayo nga agserbi kadagiti sabsabali ken mangyadelantar kadagiti interes ti Pagarian, tultuladentayo ti ulidan ni Jesus. (Fil. 2:5-8) Sapay koma ta ikagumaantayo nga aramiden dayta nga agpatpatuloy.