Ulidan Dagiti Ubbing ken Nataengan

Tinagiragsakna ti nabara, nasinged a relasionna iti Dios. Indedikarna ti biagna a mangaramid iti pagayatan ni Jehova. “Nakipagna iti pudno a Dios” ket nagunggonaan iti panangaramidna iti dayta. Isu daytoy ni Noe, maysa nga ulidan a maiparbeng a tuladen dagiti ubbing ken nataengan. (Gen. 6:9) Ti video a Noah—He Walked With God tulongannaka a mangiladawan iti panunotmo no ania idi ti biag ni Noe, no apay a binendisionan ni Jehova, ken no kasano a matuladmo dagiti nasayaat a kualidadna.

Adda nairaman a salsaludsod iti DVD nga edision ti video a Noah. Buyaem ti video sa isaludsodmo iti bagim: (1) Ania ti di umiso nga inaramid dagiti dadduma nga anghel, ken siasino dagiti Nefilim? (Gen. 6:1, 2, 4) (2) Apay a nagbalin a dakes dagiti tattao, ken ania ti narikna ti Dios iti dayta? (Gen. 6:4-6) (3) Kasano a naiduma ni Noe? (Gen. 6:22) (4) Kasano a nadadael dagiti nadangkes? (Gen. 6:17) (5) Kasano kadakkel ti daong? (Gen. 6:15) (6) Ania pay ti inaramid ni Noe, ken ania ti reaksion dagiti tattao? (Mat. 24:38, 39; 2 Ped. 2:5) (7) Mano ti bilang ti tunggal klase ti animal a naiserrek iti daong? (Gen. 7:2, 3, 8, 9) (8) Kasano kabayag a nagtudo, ken kasano kabayag a nalayus ti daga? (Gen. 7:11, 12; 8:3, 4) (9) Apay a nakalasat ni Noe ken ti pamiliana? (Gen. 6:18, 22; 7:5) (10) Sadino ti nakaisadsadan ti daong? (Gen. 8:4) (11) Kasano nga ammo ni Noe a natalgeden ti rummuar iti daong? (Gen. 8:6-12) (12) Ania ti inaramid ni Noe idi a nakaruar? (Gen. 8:20-22) (13) Ania ti iladladawan ti bullalayaw? (Gen. 9:8-16) (14) Ania ti kayat a sawen ti ‘pannakipagna iti Dios’? (Gen. 6:9, 22; 7:5) (15) Ania ti nasken nga aramidentayo tapno makitatayto ni Noe idiay Paraiso? (Mat. 28:19, 20; 1 Ped. 2:21)

Ania ti insuro kenka ti salaysay ti Biblia maipapan ken matalek, natulnog a Noe no kasanoka met a ‘makipagna iti Dios’ ken makapagtalek a kabaelan ni Jehova nga ispalen dagiti adipenna ita?—Gen. 7:1; Prov. 10:16; Heb. 11:7; 2 Ped. 2:9.