Ti Ministeriotayo—Trabaho nga Ebkas ti Asi
1 Napaliiw ni Jesus a dagiti rineprep a dimngeg iti mensahena ket “nalalatan ken naiwarawarada a kasla karkarnero nga awanan pastor.” (Mat. 9:36) Buyogen ti kinadungngo ken ayat, insurona kadakuada dagiti pagalagadan ni Jehova, nangliwliwa, ken siaasi nga impaayna dagiti naespirituan a kasapulanda. Bayat nga ut-utobentayo dagiti dana ni Jesus, masursurotayo ti agpanunot ken makarikna a kas kenkuana, ket agminar daytoy nga ebkas ti asi iti ministeriotayo.
2 Panunotenyo iti apagbiit no ania ti reaksion ni Jesus idi immasideg kenkuana dagiti tattao nga agkasapulan unay iti tulong. (Luc. 5:12, 13; 8:43-48) Isu ket nakonsiderasion kadagidiay naiduma ti kasasaadda. (Mar. 7:31-35) Ammona ti rikna dagiti sabsabali ket maseknan kadakuada. Saan nga agpannuray iti makinruar a langa. (Luc. 7:36-40) Wen, naan-anay nga imparangarang ni Jesus ti nadungngo a kinamanangngaasi ti Diostayo.
3 “Simnek ti Asina”: Intungpal ni Jesus ti ministeriona saan laeng a gapu ta obligasionna dayta. “Simnek ti asina” kadagiti tattao. (Mar. 6:34) Kasta met ita, saantay laeng nga ipakpakaammo ti mensahe no di ket ikagkagumaantayo nga ispalen dagiti napateg a biag. Ikagumaantay a tarusan ti tignay dagiti tattao. Apay a madukdukotan wenno okupadoda? Nabaybay-an ken naallilawda ngata kadagiti papastor ti palso a relihion? Mabalin a matignay dagiti sabsabali a dumngeg iti naimbag a damag gapu iti pudpudno a pannakaseknantayo kadakuada.—2 Cor. 6:4, 6.
4 Ti asi tukayenna ti puso. Kas panangiladawan: Adda maysa a babai a nagsagaba gapu iti nakalkaldaang nga ipapatay ti tallo a bulan pay laeng nga anakna a babai. Idi adda dua a Saksi a simmarungkar kenkuana, pinastrekna ida ta panggepna a balusingsingen ti argumentoda maipapan iti no apay a ti Dios ipalpalubosna ti panagsagaba. Ngem kinuna ti babai idi agangay: “Dimngegda kaniak buyogen ti kasta unay a pannakipagrikna, ket idi pumanawdan, simmayaat ti riknak isu nga immanamongak a sarungkarandakto manen.” Ikagkagumaanyo kadi ti mangipakita iti asi kadagiti amin a makasaritayo iti ministerio?
5 Ti panangpatanor iti asi tulongannatayo a mangiranud iti pudpudno a liwliwa kadagiti sabsabali. No aramidentayo dayta, maidaydayawtayo ni Jehova, “ti Ama dagiti nadungngo nga asi”—2 Cor. 1:3.