Patanorenyo Dagiti Naespirituan nga Ugali ket Agapitkayo Kadagiti Nabaknang a Gunggona
1. Apay a makagunggona no sukimatenyo dagiti naespirituan a rutinayo?
1 Idi nabiitkayo pay a nagbalin a Kristiano, nalabit inkagumaanyo a patanoren ti nasayaat a rutina mainaig kadagiti naespirituan nga aktibidad a pakairamanan ti panagadal iti Biblia, itatabuno kadagiti Nakristianuan a gimong, pannakiraman iti ministerio iti tay-ak, ken panagkararag. Rimmang-aykayo iti naespirituan gapu iti panangbendision ni Jehova iti panagreggetyo. Nalabit sumagmamano a tawen itan ti napalabas manipud idi nabautisarankayo. Tagtaginayonenyo kadi dagiti nasayaat a naespirituan nga ugali a pinatanoryo bayat a nagbalinkayo a Kristiano?
2. Ania ti magunggonatayo no inaldaw a basaentayo ti Biblia?
2 Sukimatenyo ti Rutinayo: Ugaliyo kadi a basaen nga inaldaw ti maysa a paset ti Sao ti Dios? Anian a nagbaknang a bendision ti apitentayo no aramidentayo dayta! (Jos. 1:8; Sal. 1:2, 3) Iti nagkauna nga Israel, tunggal ari basaenna ti bukodna a kopia ti Linteg iti “amin nga al-aldaw ti panagbiagna.” Ania ti magunggonana? Mapatanorna ti napakumbaba a puso ken masursurona ti agbuteng ken Jehova tapno saan a sumiasi kadagiti bilbilinna. (Deut. 17:18-20) Kasta met ita, ti inaldaw a panagbasa iti Biblia tulongannatayo nga agtalinaed nga awan mulitna ken natarnaw iti tengnga daytoy nadangkes, rinuker a lubong. Tulongannatayo pay nga agbalin a naan-anay a nakabalan maipaay iti ministerio.—Fil. 2:15; 2 Tim. 3:17.
3. Ania dagiti magunggonatayo no regular a tabunuantayo dagiti gimong?
3 Ugali idi ni Jesus ti mapan iti sinagoga, a sadiay a mapagsasaritaan ti Biblia. (Luc. 4:16) Awan duadua a daytoy ti nangpabileg kenkuana a mangdaer kadagiti pakasuotan a sinagabana. Mapabilegtayo met babaen kadagiti naespirituan a bilin a maipapaay kadagiti gimong iti kongregasion ken ti makagunggona a “panagsisinnukat iti pammaregta.” (Roma 1:12) Ti pannakitaripnongtayo kadagiti kakabsat tulongannatayo a mangibtur kadagiti pakarigatan kadagitoy maudi nga al-aldaw. (Heb. 10:24, 25) Ugaliyo kadi pay laeng a tabunuan dagiti amin a gimong?
4. Kasano a makagunggona kadatayo ti pannakiraman iti serbisio ti tay-ak iti tunggal lawas?
4 Salaysayen ti Biblia a dagiti apostol nakiramanda iti pannakaiwaragawag ti naimbag a damag iti “tunggal aldaw idiay templo ken iti binalaybalay.” (Ara. 5:42) Nupay ditay kabaelan ti mangasaba iti tunggal aldaw, mayugalitayo kadi ti makiraman iti dadduma a benneg ti ministerio iti tunggal lawas? No aramidentayo dayta, sigurado nga agbalintayo a nasigsigo a mangusar iti Sao ti Dios, ken nalabit maaddaantayo kadagiti makaparegta a kapadasan iti panangiranud iti kinapudno iti Biblia kadagiti sabsabali.
5. Apay a napateg ti regular a panagkararag ken Jehova?
5 Sibabaknang a nagunggonaan ni propeta Daniel gapu iti “patinayon” a panagserbina ken Jehova iti intero a panagbiagna. Ramanen daytoy ti ugalina a regular a panagkararag ken Jehova. (Dan. 6:10, 16, 20) Umasping iti dayta, no regular nga umadanitayo ken Jehova babaen ti naimpusuan a panagkararag, ipaayannatayo iti nasantuan nga espirituna. (Luc. 11:9-13) Maysa pay, ipangagnatayo ni Jehova babaen ti iyaadanina kadatayo, tapno matagiragsaktayo ti nasinged a pannakirelasion kenkuana. (Sal. 25:14; Sant. 4:8) Anian a nagdaeg a gunggona dayta! Sapay koma ngarud ta ikagumaantayo a taginayonen ti nasayaat a naespirituan nga ugali ket apitentayo dagiti nabaknang a bendision ni Jehova.