Tulonganyo Dagiti Sabsabali nga Agbalin a Gagayyem ti Dios
1 Ita, maisursuro kadagiti tattao iti amin a nasion ti daldalan ni Jehova. (Isa. 2:2, 3) Ngem tapno dagiti kasta a tattao “agbungada buyogen ti panagibtur,” masapul nga ayatenda ni Jehova. (Luc. 8:15; Mar. 12:30) No awan ti kasta a panagayat, dida mapagkedkedan dagiti dakes nga impluensia wenno awananda iti tured a mangaramid iti umiso. Ti maysa a pamay-an tapno matulongan dagiti sabsabali a mangpatanor iti nasayaat a relasion ken Jehova isu ti panangparayray iti apresasionda kadagiti galadna. Paregtaen ida a mangusig a naimbag iti impormasion iti libro nga Umadanika ken Jehova.
2 Ti Ulidanyo: Mabalin a ti mismo a konduktayo ket dakkel ti epektona iti puso dagiti iyad-adalanyo iti Biblia. No makitada nga ipatpategyo ti pannakigayyemyo ken ni Jehova ken makitada no kasano nga ap-apektaran dayta ti biagyo, mabalin a matignayda a mangpatanor iti kasta a personal a relasion. (Luc. 6:40) Wen, masansan a ti ulidantayo napigpigsa ti impluensiana kadagiti sabsabali ngem iti ibagbagatayo.
3 Ti maysa a kangrunaan a pamay-an tapno dagiti nagannak maisuroda dagiti annakda a mangayat ken Jehova ket babaen ti ulidanda. (Deut. 6:4-9) Kayat ti maysa a pagassawaan a mapadakkel dagiti annakda iti kinapudno isu a nagpabalakadda kadagiti naballigi a nagannak. “Imbaga ti tunggal maysa a nakasaritak a nakapatpateg ti ulidan dagiti nagannak,” kinuna ti asawa a lalaki. Ngarud, iti amin a wagas ti panagbiagda, maipakita dagiti nagannak kadagiti annakda no ania ti kaipapanan ti panagbalin a “gayyem ni Jehova.”—Sant. 2:23.
4 Naimpusuan a Panagkararag: Matulonganyo met dagiti sabsabali nga agbalin a gayyem ni Jehova babaen ti panangisuro kadakuada nga agkararagda a naimpusuan. Mabalin nga iturongyo ti atensionda iti modelo a kararag ni Jesus, agraman iti adu pay a napasnek a kararag a nailanad iti Kasuratan. (Mat. 6:9, 10) Maisuroyo dagiti annak ken iyad-adalanyo iti Biblia no kasano ti agkararag babaen ti mismo a kararagyo. No mangngegda dagiti naimpusuan nga ebkasyo, mariknada ti marikriknayo mainaig ken Jehova. Paregtaenyo ida a ‘reggetanda ti agkararag’ no maipasangoda kadagiti pakasuotan. (Roma 12:12) No mapasaranda ti tulong ni Jehova iti tiempo a kasapulanda, mangrugidan nga agtalek kenkuana ket ipategda kas pudno a gayyem.—Sal. 34:8; Fil. 4:6, 7.