Naitalek a Gameng
1 Impateg ni apostol Pablo ti inted-Dios nga annongenna a mangasaba ken imbilangna dayta kas “gameng.” (2 Cor. 4:7) Adu ti napasaranna a rigat ken pannakaidadanes gapu iti panangitungpalna iti dayta nga annongen. Inggaedna a kinasabaan ti siasinoman a nasarakanna. Narigat ken napeggad ti adu a panagdaliasatna iti daga ken iti baybay. Kasano a matuladtayo ni Pablo ken kasano a maipakitatayo nga ipatpategtayo ti ministeriotayo? (Roma 11:13) Apay a maibilang ti ministeriotayo kas di magatadan a gameng?
2 Natantan-ok a Gameng: Dagiti gameng ditoy daga ket masansan a napakuyogan iti adu a rigat sa limitado wenno temporario laeng dagiti itdenna a gunggona. Iti kasumbangirna, ti ministeriotayo ket mangyeg iti manayon a gunggona agpaay kadatayo ken kadagiti sabsabali. (1 Tim. 4:16) Daytoy ti tumulong kadagiti napasnek a tattao a mangammo iti maipapan ken ni Jehova, mangaramid kadagiti nasken a panagbalbaliw iti biagda, ken manggun-od iti napaypayso a namnama a biag nga agnanayon. (Roma 10:13-15) No ipatpategtayo unay ti ministeriotayo, kanayon a mariknatayo nga adda magapgapuanantayo, maaddaantayo iti makapnek a panggep iti biag, ken naragsak a namnama iti masanguanan.—1 Cor. 15:58.
3 Ipakitayo nga Ipatpategyo ti Gamengyo: Masansan a maiparangarang ti panangipategtayo iti maysa a banag depende no ania ti sidadaan nga isakripisiotayo agpaay iti dayta. Anian a pribilehio ti mangbusbos iti tiempo ken pigsatayo a mangidaydayaw ken ni Jehova! (Efe. 5:16, 17) Ti pamay-an a panangusartayo iti tiempotayo ipakitana koma a napatpateg dagiti naespirituan a banag ngem kadagiti material a banag. Yantangay adda napateg a banag nga iranudtayo, kayattayo ti mangasaba buyogen ti kinaganetget ken alertotayo a mangisarsarita iti naimbag a damag iti amin a gundaway.
4 Dagiti di magatadan a gameng ket gagangay a saan a maiduldulin no di ket maiplastar tapno makita dagiti sabsabali. No matmatantayo ti ministeriotayo kas maysa a gameng, agbalin dayta a nabatad a paset ti biagtayo. (Mat. 5:14-16) Buyogen ti puso a napnuan iti apresasion, sapay koma ta kanayon a tuladentayo ni apostol Pablo ken gundawayantayo ti tunggal oportunidad a mangipakita a talaga nga ipatpategtayo ti ministeriotayo, nga ibilangtayo dayta kas maysa a gameng.