Ideklarayo a Sisasaknap Dagiti Kinatan-ok ni Jehova
1 “Kukuam, O Jehova, ti kinanaindaklan ken ti kinamannakabalin ken ti kinapintas ken ti kinatan-ok ken ti dayaw; ta ti isuamin nga adda iti langlangit ken iti daga kukuam.” (1 Cron. 29:11) Ania ti epektona kadatayo ti ayat ken apresasiontayo ken Jehova? Tignayennatayo a ‘mangideklara a sisasaknap kadagiti kinatan-ok daydiay nangayab kadatayo manipud iti kinasipnget nga agturong iti nakaskasdaaw a lawagna.’ (1 Ped. 2:9) Saantayo a sumardeng a mangisarsarita kadagiti sabsabali iti maipapan iti natan-ok a Diostayo! Maaddaantayo iti naisangsangayan a gundaway a mangiwaragawag kadagiti kinatan-ok ni Jehova bayat dagiti bulan ti Marso, Abril, ken Mayo.
2 Espesial a Kampania a Mangyanunsio iti Memorial: Inton Lunes, Abril 2, maitampokto ti kinatan-ok ni Jehova babaen ti panangselebrartayo iti Pangrabii ti Apo. Manipud Marso 17 agingga iti Abril 2, maiwarasto iti intero a lubong ti espesial nga imbitasion iti daytoy a nagpateg nga okasion. Maparegta ti amin a makiraman a naan-anay iti dayta. Nagsayaat daytoy a gundaway para kadagidiay kabbaro a kualipikadon tapno makiramanda a mangikasaba iti naimbag a damag. No adda iyad-adalanyo iti Biblia wenno annakyo a kualipikadon, makisaritakayo kadagiti panglakayen.
3 Umasping daytoy a kampania iti naaramid mainaig iti “Asidegen ti Pannakaisalakan!” a Kombension Distrito. Adda umdas nga imbitasion a maipatulod kadagiti kongregasion tapno maikkan iti 50 a kopia ti tunggal agibumbunannag. Pagbalinenyo a simple ti presentasionyo, a nalabit kunaenyo: “Daytoy ti imbitasionyo para iti um-umay a tinawen a nagpateg nga okasion. Sibabara nga awisendakayo. Nailanad iti imbitasion dagiti detalyena.” Ngem no agsaludsod ti bumalay, iwayaanyo a sungbatan dayta. Makatulong iti daytoy a banag ti artikulo iti apendise maipapan iti Pangrabii ti Apo a masarakan iti libro nga Isursuro ti Biblia a mangrugi iti panid 206. Kadagiti ngudo ti lawas, itukontayo dagiti agdama a magasin a kadua ti espesial nga imbitasion. Isuratyo dagidiay interesado a nasarakanyo ken iyurnosyo ti agsubli.
4 No mabalbalin, personal koma a maited ti espesial nga imbitasion iti tunggal bumalay. No limitado ti teritoriayo, isuratyo dagidiay pagtaengan nga awan ti bumalayna ket ikagumaanyo a sublian ida. No nalawa ti teritoria ti kongregasionyo, mabalin nga ikeddeng dagiti panglakayen nga ibati lattan ti imbitasion kadagiti pagtaengan nga awan ti bumalayna ngem naannad koma ti panangaramidyo iti dayta. Siguraduenyo a maikkan iti imbitasion dagiti sarsarungkaran, iyad-adalan iti Biblia, kakabagian, katrabahuan, kaarruba, ken dadduma pay nga am-ammoyo.
5 Panag-auxiliary Pioneer: Mabalinyo kadi nga ideklara nga ad-adda pay dagiti kinatan-ok ni Jehova babaen ti panag-auxiliary pioneer bayat ti Marso, Abril, ken Mayo? Mabalin nga agkasapulan dayta iti sumagmamano a panagbalbaliw iti inaldaw nga eskediulyo. (Efe. 5:15-17) Masiguradoyo a mangyeg iti rag-o ken pamendision ni Jehova ti panangikagumaanyo nga agserbi nga ad-adda pay kenkuana. (Prov. 10:22) Yantangay umad-adanin ti Memorial, itan ti tiempo nga agplanokayo.—Prov. 21:5.
6 Tinagiragsak ti maysa a kabsat a babai, nga agtawen iti 90, ti pribilehiona a panag-auxiliary pioneer idi napan a tawen. Kinunana: “Nupay kaay-ayok ti agmula ken kayatkon nga irugi dayta, napanunotko a masapul nga ikeddengko no ania ti iyun-unak. Gapu ta tarigagayak nga iyun-una dagiti interes ti Pagarian, inkeddengko ti nag-auxiliary pioneer idi Marso.” Nagunggonaan kadi ti panagreggetna? Kunana, “Nariknak nga ad-adda a simmingedak iti kongregasion, ket ad-adda a nayadaniak ken Jehova.” Mabalintayo kadi a tingitingen no ania dagiti prioridadtayo ken mangaramid iti umasping a panagbalbaliw no kasapulan?
7 Mabalin a ti panangragpat iti 50 nga oras a maikalikagum kadagiti auxiliary pioneer ket saan a narigat a kas iti ipagarupyo. Buyogen ti kararag, usigenyo dagiti inaldaw nga aktibidadyo, mangaramidkayo iti eskediul, ken isuratyo dayta iti kalendarioyo. Mas kabesadoyo ti kasasaadyo. No nakapuy ti salun-atyo ken nalakakayo a mabannog, nalabit mabalinyo ti makiraman iti ministerio iti dua nga oras iti kada aldaw. No ages-eskuela wenno agtartrabahokayo iti amin-tiempo, mabalinyo ti ag-auxiliary pioneer babaen ti pannakiramanyo a mangasaba kadagiti rabii wenno kadagiti ngudo ti lawas.
8 Adu ti nag-auxiliary pioneer a sangapamiliaan. Kadagiti napalabas a tawen, adda agassawa nga agduadua nga ag-auxiliary pioneer gapu ta ipagarupda a saan nga ipalubos ti kasasaadda. Ania ti inaramidda? “Inkararagmi ken Jehova a tulongannakami a mangitungpal iti nabayagen a kayatmi nga aramiden a dua.” Naragpatda ti kalatda buyogen ti umiso a panagplano. Kinunada pay: “Makaparagsak ta adu a bendision ti tinagiragsakmi. Isingasingmi a padasenyo met. No naaramidmi, maaramidyo met dayta.”
9 Iti sumaganad a panagadalyo kas pamilia, apay a diyo iwayaan nga usigen no kasano a rumang-ay ti panagserbiyo kadagiti sumaganad a bulbulan? Uray no saankayo a makapag-auxiliary pioneer a sangapamiliaan, mabalin a maysa a miembro ti makaaramid iti dayta babaen ti tulong ken kooperasion ti tunggal maysa. No saan, mabalin nga ikeddengyo a sangapamiliaan ti mangbusbos iti kanayonan a tiempo iti ministerio bayat dagitoy espesial a bulan ti panag-auxiliary pioneer.
10 Agtitinnulongkayo: Makaakar ti kinapinget. Isarsaritayo ti tarigagayyo nga ag-auxiliary pioneer. Mabalin a daytoy ti mangparegta kadagiti dadduma nga agpasalista. Maysa pay, dagidiay nakapagpayunir idi napalabas mabalin a makaitedda kadagiti singasing a tumulong kadakayo a mangyurnos kadagiti aktibidad ken eskediulyo tapno maragpatyo ti kalatyo. (Prov. 15:22) No kabaelanyo ti ag-auxiliary pioneer, apay a dikay awisen ti dadduma nga agibumbunannag, nalabit daydiay kapadpadayo iti kasasaad, tapno makikadua kadakayo a mangtagiragsak iti daytoy a trabaho?
11 Adu a panglakayen ti mangar-aramid kadagiti napateg nga urnos tapno makiramanda iti daytoy napateg a benneg ti panagserbi. (Heb. 13:7) Pudno a makaparegta dayta iti kongregasion! Maparayray met dagiti panglakayen ti kinaganetget nga ag-auxiliary pioneer babaen ti pannakisaritada kadagiti sabsabali. Mabalin a dagiti makaparegta a sasao wenno sumagmamano a praktikal a singasing ti kasapulan laeng tapno matignay ti dadduma nga ag-auxiliary pioneer. Nalabit, mangyurnos ti manangaywan iti serbisio kadagiti kanayonan a taripnong sakbay ti panangasaba tapno makiraman ti amin iti grupo a panangasaba, uray kalpasan ti trabaho wenno klase. Regular koma a maipakaammo daytoy nga urnos. Siguraduenna pay nga amin ket addaan iti umdas a teritoria ken literatura.
12 No saan nga ipalubos ti kasasaadyo nga ag-auxiliary pioneer-kayo, mabalinyo latta a paregtaen ken ikararagan dagidiay nagpasalista. (Prov. 25:11; Col. 4:12) Nalabit mayurnosyo ti makikadua kadakuada iti ministerio iti maysa nga aldaw ti lawas wenno ipapautyo ti makikadua kadakuada.
13 Ti Kalat a 25,000 nga Auxiliary Pioneer iti Abril: Ti kangatuan a bilang ti auxiliary pioneer iti sanga nga opisina ti Pilipinas ket 22,410, a naragpat idi 1997. Ngarud, 25,000 nga auxiliary pioneer ti realistiko a kalat para iti Abril. Maragpattayo dayta no 1 iti tunggal 6 nga agibumbunannag iti kada kongregasion ket ag-auxiliary pioneer. Siempre, dadduma a kongregasion ti addaan iti ad-adu pay nga agibumbunannag a nawaya a makapag-auxiliary pioneer. Dayta a kalat ket nalaka la a ragpaten ti kaaduan a kongregasion. Panunotenyo laengen ti ragsak nga itden daytoy iti kongregasionyo ken ti positibo nga epektona iti trabaho a panangasaba iti teritoriayo!
14 Apay a ti Abril ket nagsayaat a bulan para iti panag-auxiliary pioneer? Maangay ti Memorial iti maikadua nga aldaw ti bulan isu nga adu ti gundawaytayo a mangsarungkar kadagidiay tumabuno. Itukontayo dagiti magasin a ti panggeptayo ket makaipaima iti libro nga Isursuro ti Biblia kadagiti sumaganad a panagsarungkar ken makairugitayo kadagiti panangyadal iti Biblia. Ngarud, ti panag-auxiliary pioneer inton Abril ket mangipaay iti adu a gundaway a mangirugi kadagiti panangyadal iti Biblia. Iti daytoy a pagilian, at-atiddog ti aldaw ken masansan a nasayaat ti paniempo. Maysa pay, lima ti Domingo iti Abril ken addaan iti nailubongan a piesta isu a nalaklaka kadagidiay agtartrabaho ken ages-eskuela ti agpasalista.
15 Iti tunggal Memorial nga aglabas, maysa a tawen ti umasidegantayo iti panungpalan ti sistema dagiti bambanag. Maksayan ti nabati a tiempo a panangisarsaritatayo kadagiti sabsabali iti maipapan iti natan-ok a Diostayo. (1 Cor. 7:29) Apaman a malpas ti Memorial, mapukawton ti itdenna a napateg a gundaway tapno maidaydayawtayo ti nailangitan nga Amatayo. Agsaganatayo koma itan a mangaramid iti amin a kabaelantayo inton Marso, Abril, ken Mayo tapno maideklaratayo a sisasaknap dagiti kinatan-ok ni Jehova!
[Salsaludsod]
1. Ania ti mangtignay kadatayo a mangideklara a sisasaknap kadagiti kinatan-ok ni Jehova?
2. Ania nga espesial a kampania ti naiplano a mangyanunsio iti Memorial, ken siasino ti mabalin a makiraman iti dayta?
3. Ania ti mabalin nga ibagatayo no awisentayo dagiti tattao a tumabuno iti Memorial?
4. Kasano a maiwaras dagiti espesial nga imbitasion iti Memorial?
5. Apay nga iplanotayo itan ti ag-auxiliary pioneer?
6. Ania ti maadaltayo iti kapadasan ti kabsat nga agtawen iti 90 a nag-auxiliary pioneer idi napan a tawen?
7. Narigat kadi ti ag-auxiliary pioneer?
8. Kasano a nakapag-auxiliary pioneer ti maysa a pagassawaan?
9. Ania ti mabalinyo nga aramiden iti sumaganad a panagadal ti pamiliayo kas panagsagana kadagiti espesial a bulan ti panag-auxiliary pioneer?
10. Apay a nasken nga isarsaritatayo kadagiti dadduma ti tarigagaytayo nga ag-auxiliary pioneer bayat daytoy panawen ti Memorial?
11. Kasano a maparayray dagiti panglakayen ti kinaganetget nga ag-auxiliary pioneer kadagiti sumaganad a bulbulan?
12. Ania ti mabalinyo nga aramiden no saankay a makapag-auxiliary pioneer?
13. Ania a kalat ti naipasdek ditoy Pilipinas, ken kasano a makatulong ti kongregasionyo tapno maragpat dayta?
14. Apay a ti Abril ket nagsayaat a bulan para iti panag-auxiliary pioneer?
15. Apay a rumbeng a mariknatayo ti kinaganat bayat nga umas-asideg ti Memorial?
[Kahon iti panid 4]
Kabaelantayo Kadi ti Maaddaan iti 25,000 nga Auxiliary Pioneer iti Abril?
◼ Usigenyo dagiti prioridadyo
◼ Pagsasaritaanyo ti kalatyo kas pamilia
◼ Isarsaritayo kadagiti dadduma ti planoyo