“Itultuloyyo nga Aramiden Daytoy kas Panglaglagip Kaniak”
Malaglagip ti Ipapatay ni Jesus Inton Abril 2
1. Apay a napateg a petsa ti Abril 2, 2007?
1 Inton Abril 2, 2007, agtataripnong ti riniwriw a tattao iti intero a lubong tapno laglagipenda ti sakripisio nga ipapatay ni Jesus. Natay ni Jesus kas manangitandudo iti kinasoberano ti nailangitan nga Amana, a nangpaneknek nga ulbod ti akusasion ni Satanas a Diablo a dagiti tattao agserserbida laeng iti Dios gapu iti inaagum a motibo. (Job 2:1-5) Ti Pangrabii ti Apo ipalagipna met kadatayo a babaen ti ipapatay ni Jesus kas perpekto, awanan basol a tao, ‘intedna ti kararuana kas subbot a kasukat dagiti adu.’ (Mat. 20:28) Gapuna, imbilin ni Jesus kadagiti adalanna: “Itultuloyyo nga aramiden daytoy kas panglaglagip kaniak.” (Luc. 22:19) Ti kadi panangapresiar iti daytoy nagpateg a sagut ti Dios tinignaynaka nga agsagana maipaay iti daytoy a katan-okan a pannakaiparangarang ti ayat?—Juan 3:16.
2. Kasanotayo a maisagana ti pusotayo para iti panangrambak iti Memorial?
2 Isaganayo ti Pusoyo: Maisaganatayo ti pusotayo para iti panangrambak iti Memorial no usigentayo dagiti pasamak kadagiti maudi nga aldaw ti biag ni Jesus kas tao. (Esd. 7:10) Iti panangaramidtayo iti daytoy, makatulong ti eskediul ti espesial a panagbasa iti Biblia a masarakan iti Panangsukimat Kadagiti Kasuratan—2007 ken iti 2007 Calendar. Daytoy a nakaeskediul a panagbasa ket dandani katupag dagiti aldaw a pannakapasamak dagiti bambanag a mainaig iti ipapatay ni Jesus sigun iti kalendario nga us-usarentayo ita. Dagiti aldaw ken petsa a nadakamat kadagiti salaysay ti Biblia ket naibatay iti kalendario dagiti Judio. Ti maysa nga aldaw ket mangrugi iti ilelennek ti init ken agngudo iti ileleggakna. Naikabilangan daytoy a pamay-an ti panagbilang iti aldaw ken daytoy ti nasurot iti eskediul ti panagbasa iti Biblia bayat ti panawen ti Memorial. Ti panangrepaso iti kasta nga impormasion ken ti panangutob buyogen ti kararag no kasano kauneg ti ayat ti Dios tulongannatayo a magunggonaan a naan-anay iti panangrambak iti Memorial.
3. Kasano a matulongantayo dagiti interesado ken di aktibo a magunggonaan iti Memorial?
3 Awisenyo Dagiti Sabsabali a Tumabuno: Iti suplemento ti Pebrero a Ti Ministeriotayo iti Pagarian, naipakaammo ti espesial a kampania a panangawis kadagiti tattao a tumabuno iti daytoy napateg nga okasion. Nakaaramidkayo kadin kadagiti urnos tapno naan-anay a makiramankayo iti daytoy a kampania? Nailistayo kadin dagidiay am-ammoyo a planoyo nga awisen, ken nakasaritayo kadi idan? Iplanoyo itan ti sumangpet a nasapa iti rabii ti Memorial tapno abrasaenyo dagidiay inawisyo kasta met dagiti dadduma pay nga interesado. Nalabit kayatyo ti makikatugaw kadakuada, a siguraduenyo nga adda Biblia ken pagkantaanda. Iyam-ammoyo ida kadagiti dadduma pay iti kongregasion. Kalpasan ti programa, iwayaanyo a sungbatan dagiti saludsodda. Awisenyo ida a tumabuno iti espesial a palawag publiko a maipaay inton Abril 15. Nangnangruna a maseknan dagiti panglakayen iti panangsigurado a maikkan iti imbitasion iti Memorial ken espesial a palawag dagidiay naitimpuyog iti kongregasion ngem nagbalin a di aktibo.
4. Kasano a matulongantayo dagiti tattao nga agtultuloy a rumang-ay iti naespirituan kalpasan ti Memorial?
4 Tulonganyo a Rumang-ay Dagiti Kabbaro nga Interesado ken Di Aktibo: Ti ispiker iti Memorial ilawlawagna iti apagbiit a mangituktukontayo iti libre a panagadal iti Biblia ken iparegtana kadagidiay kabbaro nga interesado nga itultuloyda nga ammuen ti maipapan ken ni Jehova. Mabalinyo nga usaren ti komentona kas pangibatayan ti panangitukonyo iti kanayonan a naespirituan a tulong kadagidiay inawisyo. No saanda pay nga agad-adal iti Biblia, siguraduenyo a sarungkaran ida iti kabiitan a panawen kalpasan ti Memorial ken idemostrayo ti libre a panagadal iti Biblia. Tapno rumang-ayda iti naespirituan, nasken a tabunuanda met dagiti gimong ti kongregasion. (Heb. 10:24, 25) Tapno maaramidyo dayta, paregtaenyo ida a tumabunon a regular. Masapul a dagiti panglakayen sarungkaranda dagiti di aktibo a Kristiano a timmabuno iti Memorial ken tulonganda ida a mangikabilangan kadagiti impormasion a naidatag iti palawag. Mabalin a daytoy ti mangparegta kadakuada a mangitultuloy iti aktibidadda iti kongregasion.
5. Kasano a magunggonaantayo ti panangrambak iti Memorial?
5 Ti panangrambak iti Memorial ti mangipaay kadatayo iti gundaway a mangutob a naimbag iti inaramid da Jehova ken Jesus agpaay kadatayo. Ti kasta a panagmennamenna ti mangpauneg iti ayattayo kadakuada ken mangimpluensia iti kababalintayo. (2 Cor. 5:14, 15; 1 Juan 4:11) Itan ti tiempo tapno irugitayon nga isagana ti bagitayo ken dagiti interesado agpaay iti daytoy napateg nga okasion a ‘pangiwaragawagantayo iti ipapatay ti Apo.’—1 Cor. 11:26.