Mabalin a Makiraman ti Amin iti Panangaramid Kadagiti Baro nga Adalan
1 Ti baro nga adalan ket saan a resulta ti kinapinget ti maymaysa laeng a tao. Mabalin nga usaren ni Jehova ti amin a ‘katrabahuanna’ a tumulong kadagiti estudiante iti Biblia a rumang-ay iti naespirituan. (1 Cor. 3:6-9) Kas indibidual, matulongantayo dagiti kabbaro saan laeng a babaen kadagiti naimpusuan a komentotayo kadagiti Nakristianuan a gimong no di ket iti pay nasayaat a kababalintayo, a mangted iti natibker a pammaneknek nga agan-andar ti espiritu ti Dios iti biagtayo. (Juan 13:35; Gal. 5:22, 23; Efe. 4:22, 23) Ania pay ti mabalin nga aramiden tapno matulongan dagiti kabbaro?
2 Kas Maysa a Kongregasion: Maipakitatayo amin a maseknantayo kadagidiay agdadamo a makigimong babaen ti nabara a panangkablaaw ken pannakisaritatayo kadakuada sakbay ken kalpasan ti gimong. Kastoy ti kinuna ti maysa a lalaki maipapan iti damo a pannakilangenna iti kongregasion: “Iti maysa laeng nga aldaw, ad-adu ti naam-ammok nga estranghero ngem pudpudno a naayat a tattao, no idilig kadagiti naam-ammok iti relihion a nariingak. Nabatad a nabirokakon ti kinapudno.” Isu ket nabautisaran pito a bulan kalpasan ti damo nga itatabunona iti gimong.
3 Sipapasnek a komendaranyo ti estudiante iti Biblia bayat a rumangrang-ay iti naespirituan. Ti kadi estudiante iti Biblia ket agib-ibtur iti ibubusor? Regular kadin a tumabtabuno kadagiti gimong? Maituredna kadin ti agkomento? Nagpasalista kadin iti Teokratiko nga Eskuelaan ti Panagministro wenno inruginan ti makiraman iti ministerio? Komendaranyo ti rimmang-ayanna. Daytoy ti mangpatibker ken mangpabileg kenkuana.—Prov. 25:11.
4 Kas Mangyad-adal iti Biblia: Adda dagiti agibumbunannag a nangtulong kadagiti iyad-adalanda iti Biblia a makiam-ammo kadagiti indibidual a kameng ti kongregasion babaen ti panangkiddawda kadagiti dadduma pay nga agibumbunannag a makiraman iti panagadalda. Iti damo pay laeng, awisenyon ti iyad-adalanyo a tumabuno kadagiti gimong iti kongregasion. No iruginan ti makigimong, siguraduenyo nga iyam-ammo kadagiti sabsabali. Ikagkagumaanna kadi a parmeken ti dakes nga aramid, kas iti panagsigarilio? Adda kadi kameng ti pamiliana a mangbusbusor iti panagadalna? Isu ket magunggonaan no makisarita iti agibumbunannag a naipasango ken nangparmek iti kasta met laeng a karit.—1 Ped. 5:9.
5 Kasapulan dagiti kabbaro ti naespirituan a tulong ti kongregasion. Kabaelantayo amin a tulongan ida a rumang-ay babaen ti panangipakita iti napasnek a pannakaseknantayo kadakuada.