Iranudtayo ti Namnamatayo nga Itden ti Pagarian
1 Kadagitoy narikut a maudi nga al-aldaw, adu a tattao ditoy lubong ti awanan iti namnama. (Efe. 2:12) Adda met dagidiay di nainsiriban nga agtaltalek kadagiti material a kinabaknang, tattao nga agtuturay, moderno a siensia, ken dadduma pay. Anian a ragsaktayo ta addaantayo iti napaypayso a namnama iti masanguanan, ti namnama a kas “maysa a sinipete maipaay iti kararua, agpadpada a sigurado ken natibker”!—Heb. 6:19.
2 Ti daga ket agbalinto a paraiso iti sidong ti panagturay ti Pagarian ti Dios. Agungarto dagiti natayen nga ing-ingungotentayo. (Ara. 24:15) Agpatingganton ti kinapanglaw, kinaawan hustisia, sakit, panaglakay, ken ipapatay. (Sal. 9:18; Mat. 12:20, 21; Apoc. 21:3, 4) Dagitoy ti sumagmamano kadagiti kari ni Jehova nga asidegen a matungpal. Ania nga aspeto ti namnamatayo ti nangnangruna a padpadaananyo?
3 Ipakaammotayo ti Naimbag a Damag: Nasken a saantay a bukbukodan ti namnama nga itden ti Pagarian. Ti ayattayo iti Dios ken kadagiti padatayo a tattao tignayennatayo a mangtulad kenni Jesus ken “mangideklara ti naimbag a damag kadagiti napanglaw, . . . tapno ikasaba ti pannakaluk-at kadagiti kautibo ken ti pannakaisubli ti panagkita kadagiti bulsek, tapno dagidiay nailupitlupit papanenna buyogen ti panangluk-at.” (Luc. 4:18) Inkasaba ni apostol Pablo ti naimbag a damag iti plasa ken iti sadinoman a pakasarakanna kadagiti tattao. Naan-anay nga impamaysana ti ministeriona. (Ara. 18:5) No tuladentayo ti kinaregtana iti ministerio, “dagiti pakaringgoran daytoy a sistema ti bambanag ken ti makaallilaw a pannakabalin ti kinabaknang” saanda a mapagkudrep ti namnamatayo kas Kristiano.—Mar. 4:19.
4 Saan nga agkupas ti namnamatayo nga itden ti Pagarian uray no makasaraktayo kadagiti tattao a manangyaleng-aleng, saan unay nga interesado iti mensahe maipapan iti Pagarian, wenno bumusbusor kadatayo. ‘Petpetpetantayo a siiirut ti publiko a panangideklara iti namnamatayo nga awan panagpangpangadua.’ (Heb. 10:23) Ditay “ibain ti naimbag a damag.” (Roma 1:16) Mabalin a ti nabileg a pammati ken kinaanustayo ti mangtignay kadagiti dadduma a dumngeg inton agangay.
5 Nupay maitutop nga ibagatayo ti agrakrakayan a kasasaad ti lubong kas kaitungpalan ti padto ti Biblia, saantayo a manangikaskasaba iti didigra. Imbes ketdi, naipamaysa ti ministeriotayo iti namnama nga itden ti Pagarian—ti naimbag a damag maipapan iti Pagarian ti Dios. Sapay koma ta ikasabatayo daytoy a naimbag a damag buyogen ti nabileg a pammati ken kinaregta ‘tapno maaddaantayo iti naan-anay a pammasiguro iti namnama agingga iti panungpalan.’—Heb. 6:11.