“Sisisinged a Surotenyo Dagiti Addangna”
1. Kasanotayo nga agbalin nga epektibo a ministro?
1 Saan a nagadal ni Jesus kadagiti eskuelaan dagiti rabbi, ngem kaskasdi nga isu ti katan-okan a Ministro iti historia. Nasayaat ta naitalimeng nga agpaay a pakagunggonaantayo ti naisurat a rekord ti ministerio ni Jesus. Tapno agbalintayo nga epektibo a ministro, nasken a ‘sisisinged a surotentayo dagiti addangna.’—1 Ped. 2:21.
2. Ania ti tumulong kadatayo a mangpatanor iti panagayat kadagiti tattao kas iti inaramid ni Kristo?
2 Iparangarangyo ti Ayat Kadagiti Tattao: Ti naayat a pannakaseknan kadagiti tattao ti nangtignay ken Jesus. (Mar. 6:30-34) Adu a tattao iti teritoriatayo ti “agpapaut-ot” ken mawaw iti kinapudno. (Roma 8:22) No sipapanunottayo iti nakalkaldaang a kasasaadda ken iti naayat a pannakaseknan kadakuada ni Jehova, matignaytayo nga agtultuloy a mangasaba. (2 Ped. 3:9) Malaksid iti dayta, ad-adda a dumngeg dagiti tattao iti mensahetayo no makitada a pudpudno a maseknantayo kadakuada.
3. Kadagiti ania a gundaway a nangasaba ni Jesus?
3 Mangasabakayo Tunggal Adda Gundaway: Inaprobetsar ni Jesus ti tunggal gundaway a mangiranud iti naimbag a damag kadagiti sabsabali. (Mat. 4:23; 9:9; Juan 4:7-10) Umasping iti dayta, kayattayo met ti agbalin a nakasagana a mangisarsarita iti kinapudno bayat nga aramidentayo dagiti inaldaw nga aktibidadtayo. Dagiti dadduma, mangitugtugotda iti Biblia ken literatura tapno mabalinda ti mangasaba iti pagtrabahuanda, iti eskuelaanda, bayat nga agbibiahe ken aggatgatangda, ken dadduma pay.
4. Kasanotayo a maipamaysa ti Pagarian kas tema ti panangasabatayo?
4 Ipamaysayo ti Pagarian: Ti naimbag a damag maipapan iti Pagarian ti inkaskasaba ni Jesus. (Luc. 4:43) Nupay saantay a dagus wenno direkta a dakamaten ti maipapan iti Pagarian bayat ti panangasabatayo, tulongantay ti bumalay a mangtarus a kasapulanna dayta. Uray no dakdakamatentayo ti dakes a kasasaad ti lubong a mangipakita nga agbibiagtayon iti maudi nga al-aldaw, ti kangrunaan nga ‘ideklaratayo ket ti naimbag a damag ti naimbag a bambanag.’—Roma 10:15.
5. Tapno epektibo ti ministeriotayo, kasano ti rumbeng a panangusartayo iti Biblia?
5 Agpannuraykayo iti Sao ti Dios: Iti intero a ministeriona, nagpannuray ni Jesus iti Kasuratan. Saanna a bukod a pannursuro dagiti insurona. (Juan 7:16, 18) Nagbalin a pannakataraonna ti Sao ti Dios ken inyaplikarna dayta idi isu ket sinulisog ni Satanas. (Mat. 4:1-4) Tapno epektibo ti panangisurotayo kadagiti sabsabali, nasken nga inaldaw a basaentayo ti Biblia ken iyaplikartayo dayta. (Roma 2:21) No sumungbattayo kadagiti saludsod bayat ti panangasabatayo, masapul a mangdakamattayo iti teksto a mangsuporta iti sungbattayo ken no posible, direkta a basaentayo dayta iti Biblia. Kayattayo nga ipakita iti bumalay a saantay a bukod a kapanunotan ti ibagbagatayo no di ket kapanunotan ti Dios.
6. Ania ti inaramid ni Jesus tapno madanonna ti puso dagidiay dumdumngeg kenkuana?
6 Danonenyo ti Puso ti Isursuroyo: “Awan pay a pulos sabali a tao a nagsao iti kastoy.” (Juan 7:46) Kasta ti insungbat dagiti opisial idi sinaludsod ti panguluen a papadi ken dagiti Fariseo no apay a saanda nga inaresto ni Jesus. Imbes a basta mangiranud kadagiti impormasion, nangisuro ni Jesus iti wagas a dumanon iti puso dagidiay sinursuruanna. (Luc. 24:32) Isu ket nagusar kadagiti pangngarig maipapan iti inaldaw a biag dagiti tattao tapno nabiag ti panangisurona. (Mat. 13:34) Saan a ginabsuonan ni Jesus dagiti dumdumngeg kenkuana iti adu nga impormasion. (Juan 16:12) Inturongna ti atension ken Jehova imbes nga iti bagina. Kas ken Jesus, agbalintayo a nalaing a mannursuro babaen laeng ti ‘agtultuloy a panangasikasotayo iti isursurotayo.’—1 Tim. 4:16.
7. Apay a saan a simmuko ni Jesus iti ministerio?
7 Dikay Sumuko iti Laksid ti Panangyaleng-aleng ken Ibubusor: Nupay nagaramid ni Jesus kadagiti milagro, adu ti saan a dimngeg kenkuana. (Luc. 10:13) Uray dagiti mismo a kameng ti pamiliana kinunkunada a “napukawnan ti nakemna.” (Mar. 3:21) Nupay kasta, saan a simmuko ni Jesus. Nagtalinaed a positibo ti kababalinna gapu ta naan-anay a kombinsido nga adda kenkuana ti kinapudno a mangwayawaya kadagiti tattao. (Juan 8:32) Babaen ti tulong ni Jehova, determinadotayo met a saan a sumuko.—2 Cor. 4:1.
8, 9. Kasanotayo a matulad ni Jesus no iti panagsakripisio maigapu iti naimbag a damag?
8 Agsakripisiokayo Tapno Naan-anay a Makiramankayo: Insakripisio ni Jesus dagiti material a pagnam-ayan gapu iti ministeriona. (Mat. 8:20) Kanayon a nangaskasaba uray no rumabiin no dadduma. (Mar. 6:35, 36) Ammo ni Jesus a limitado ti panawenna a mangitungpal iti trabahona. Yantangay “ti tiempo a nabati ket ababan,” nasken a mangisakripisiotayo met iti tiempo, pigsa, ken sanikuatayo kas panangtulad ken Jesus.—1 Cor. 7:29-31.
9 Dagiti Kristiano idi umuna a siglo ket epektiboda a ministro gapu ta nagsursuroda ken Jesus. (Ara. 4:13) Naan-anay met a maitungpaltayo ti ministeriotayo no tuladentayo ti katan-okan a Ministro iti historia.—2 Tim. 4:5.