Liwliwaenyo Dagidiay Malmaldaangan
1. Apay nga agkasapulan iti liwliwa dagidiay malmaldaangan?
1 Nasaem ti mapukawan iti ing-ingungoten gapu iti ipapatay, nangruna para kadagidiay awanan iti namnama nga ipaay ti Pagarian. (1 Tes. 4:13) Masansan nga iyim-imtuod ti adu a tattao: ‘Apay a matay dagiti tattao? Ania ti mapasamak no matayda? Makitakto pay ngata dagiti natayen nga ipatpategko iti biag?’ Makatulong dagiti sumaganad a singasing tapno maliwliwatayo dagidiay masarakantayo iti ministerio a lumlumdaang gapu iti ipapatay ti maysa a kabagian wenno gayyemda.—Isa. 61:2.
2. Kanayon kadi a maitutop ti atiddog a panangasaba uray no ibaga ti bumalay a madama pay la nga agladladingit?
2 Iti Panagbalaybalay: Nalabit madakamat ti bumalay a nabiit pay a natay ti maysa a miembro ti pamiliana. Madlaw kadi a nagsangsangit? Adda pay laeng kadi iti balayda dagiti malmaldaangan a kakabagianda? Kadagita a kasasaad, kasayaatan no saantayo pay laeng nga agbayag a makisarita kadakuada. (Ecl. 3:1, 7) Nalabit iyebkastayo ti pannakipagriknatayo, ikkantayo iti maitutop a tract, magasin, wenno broshur, satayo agpakada. Kalpasanna, agsublitayto iti maitutop a tiempo tapno iranud kadakuada ti kanayonan a namnama manipud iti Biblia.
3. No ipalubos ti kasasaad, ania dagiti teksto a mabalintay nga ibasa iti agladladingit a bumalay?
3 Iti dadduma a kasasaad, mabalin a maitutop no ad-adu ti ibagatayo iti umuna a pannakisaritatayo. Nupay saan a daytoy ti panawen a kontraentayo ti di umiso a panangmatmatna, mabalintayo nga ibasa kenkuana dagiti kari ti Biblia maipapan iti panagungar. (Juan 5:28, 29) Mabalin met nga iranudtayo kenkuana no ania ti kuna ti Biblia maipapan iti kasasaad dagiti natay. (Ecl. 9:5, 10) Nalabit maliwliwa met no ibasatayo kenkuana ti maysa a pasamak iti Biblia maipapan kadagiti tattao a napagungar. (Juan 11:39-44) Wenno saan, usigentayo ti sasao nga inyebkas ti matalek a ni Job kas pananginanamana ken Jehova. (Job 14:14, 15) Sakbay nga agpakadatayo, mabalin nga ikkantayo iti broshur nga Ania ti Mapasamak Kadatayo No Mataytayo?, No Adda Matay nga Ay-ayatenyo, wenno ti sabali pay a maitutop a broshur wenno tract. Mabalin met nga ibatiantayo iti libro nga Isursuro ti Biblia, satay ipakita ti linaon ti kapitulo 6, ken iyurnostayo a pagtungtongantayto dayta iti sumaruno nga isasarungkartayo.
4. Ania ti dadduma pay a gundaway a mabalintay ti mangipaay iti liwliwa?
4 Iti Dadduma pay a Kasasaad: No ti palawag ti pumpon ket maangay iti Kingdom Hall, adda kadi saan a Saksi a tumabuno? Mabalintayo nga ipaayan ida kadagiti literatura a mangted iti liwliwa. Adda dagiti puneraria a nangapresiar kadagiti maitutop a publikasion a naibati kadakuada a basaen dagiti agladladingit a pamilia. No dadduma, dagiti benneg iti pagiwarnak maipapan kadagiti pimmusay ikkannatayo iti gundaway a mangipaay iti ababa a surat a pangliwliwa kadagiti malmaldaangan a miembro ti pamilia. Kas pagarigan, ti maysa a balo a lalaki ken ti balasangna ket napan iti pagtaengan ti maysa nga agibumbunannag kalpasan a nakaawatda iti maysa a surat a pakairamanan ti sumagmamano a tract. Dinamagda iti agibumbunannag: “Dakayo kadi ti nangipatulod iti daytoy a surat? Kinapudnona, kayatko a maammuan ti ad-adu pay maipapan iti Biblia!” Ti agama ket nakipagadal iti Biblia ken nangrugida metten a makigimong.
5. Apay a masapul nga alertotayo kadagiti gundaway a mangipaay iti liwliwa kadagidiay malmaldaangan?
5 Kuna ti Eclesiastes 7:2: “Nasaysayaat ti mapan iti balay ti panagleddaang ngem ti mapan iti balay ti bangkete.” Kaaduanna a mas interesado a dumngeg iti Sao ti Dios ti maysa nga agladladingit ngem iti daydiay naigamer iti ragragsak. Masapul nga alertotayo amin a mangilasin kadagiti maitutop a gundaway a mangliwliwa kadagidiay natayan kadagiti patpatgenda iti biag.