Suruanyo Dagiti Sabsabali nga Ayatenda ni Jehova
1. Ania ti nangyadani iti dadduma ken Jehova?
1 Malagipmo pay kadi daydi damo a pannakangngegmo iti maipapan ken Jehova? Ania ti nangtignay kenka nga umadani kenkuana? Adu a nasingpet-panagpuspusona a tattao ti mangibaga a nagutugotda nga umadani iti Namarsua idi naammuanda dagiti awan kaaspingna a kualidad ti Dios, nangnangruna ti asi ken ayatna.—1 Juan 4:8.
2, 3. Kasanotayo nga usaren ti libro nga Isursuro ti Biblia a mangisuro kadagiti mayad-adalan iti Biblia a mangpauneg iti panagayatda ken Jehova?
2 “Daytoy ti Diostayo”: Ti libro nga Isursuro ti Biblia pagminarenna ti ayat ni Jehova ken ti kinapateg ti personal a pannakirelasion kenkuana. Kasanotayo nga usaren daytoy a publikasion a mangisuro kadagiti sabsabali a mangpauneg iti panagayatda iti Dios? No ad-adalentayo ti maysa a baro a punto, mabalintay nga iyimtuod dagiti mamagpanunot a saludsod a kas iti: “Ania ti ipalgak daytoy a kinapudno maipapan ken Jehova?” wenno “Kasano a patalgedan daytoy a punto a ni Jehova ti kasayaatan pay laeng nga Ama a mabalin a maam-ammo ti maysa?” Ti panangisuro iti kastoy a wagas ket makatulong iti mayad-adalan a mangirugi iti manayon a pannakirelasion ken Jehova.
3 No tulongantayo dagiti mayad-adalan iti Biblia a mangapresiar no kasano kapateg ti maaddaan iti pannakaammo maipapan iti maymaysa a pudno ken sibibiag a Dios, mabigbigdanto ti kas iti kinuna ni Isaias a “daytoy ti Diostayo.” (Isa. 25:9) No ilawlawagtayo ti Sao ti Dios, nasken nga ipaganetgettayo no kasano a magunggonaan ti sangatauan inton matungpal ti panggep ni Jehova babaen ti pagarianna iti sidong ti panangituray ni Kristo Jesus.—Isa. 9:6, 7.
4, 5. Ania ti kaipapanan ti panagayat ken Jehova?
4 Panangiparangarang iti Ayat ken Jehova: Ammotayo a ti panagayat ken Jehova buyogen ti amin a puso, kararua, ken panunottayo ket saanna laeng a basta ramanen ti pannakarikna iti nabileg nga emosion. Nasken a suroten ken tuladentayo ti wagas ti panagpampanunotna. (Sal. 97:10) Maiparangarang ti ayat iti Dios babaen ti nainget a panangtungpal kadagiti bilinna ken panangtaginayon iti “nasantuan a panagbibiag ken ar-aramid ti nadiosan a debosion” uray maipasango kadagiti suot ken ibubusor.—2 Ped. 3:11; 2 Juan 6.
5 Makaparagsak nga aramiden ti pagayatan ti Dios no maigapu dayta iti ayat kenkuana. (Sal. 40:8) Masapul a mabigbig ti mayad-adalan iti Biblia nga amin dagiti bilin ti Dios ket nairanta nga agpaay iti agnanayon a pagimbagan dagiti adipenna. (Deut. 10:12, 13) Babaen ti panagbiag a maitunos iti panangidalan ni Jehova, ipakpakita ti maysa ti naimpusuan a panagyamanna iti amin a nakaskasdaaw nga aramid ti Dios. Tulongan ti mayad-adalan a mangtarus a ti pannagna kadagiti nalinteg a daldalan ni Jehova ti mangiliklik iti maysa kadagiti parikut nga ibunga ti di panagpaidalan ken Jehova.
6. Aniada a bendision ti masagrap ti maysa no ayatenna ni Jehova?
6 Dagiti Bendision Para Kadagiti Agayat iti Dios: Maseknan unay ni Jehova kadagiti nanumo a mangay-ayat kenkuana, ken ipalgakna kadakuada “ti nauneg a bambanag ti Dios.” (1 Cor. 2:9, 10) Gapu iti dayta a pannakaammoda kadagiti panggep ni Jehova, addaanda iti nalawag a panangmatmat iti masanguanan ken napaypayso a namnama. (Jer. 29:11) Dagidiay agayat ken Jehova ket umawatda iti naisangsangayan a kinamanangngaasi. (Ex. 20:6) Ipatpategda ti namnama nga agnanayon a biag gapu iti naindaklan nga ayat nga impakita ti Dios kadakuada.—Juan 3:16.
7. Ania ti makunayo maipapan iti panangisuro kadagiti sabsabali nga ayatenda ni Jehova?
7 Bayat nga umad-adu ti pannakaammotayo iti nailangitan nga Amatayo, umad-adu met ti mairanudtayo kadagiti sabsabali. (Mat. 13:52) Anian a naindaklan a pribilehio ti mangisuro kadagiti sabsabali, nangnangruna dagiti annaktayo, nga ayatenda ni Jehova! (Deut. 6:5-7) Sapay koma ta datayo ken dagiti iyad-adalantayo ket saan a sumardeng a mangyesngaw iti pammadayaw ken Jehova bayat a sagsagrapentayo ti ‘kinaruay ti kinaimbagna.’—Sal. 145:7.