Napateg ti Personal ken Sangapamiliaan a Panagadal iti Biblia!
1. Ania ti pakaseknan unay ti Bagi a Manarawidwid agpaay kadatayo iti daytoy a tiempo, ken apay?
1 Kas idi umuna a siglo, maseknan unay ti Bagi a Manarawidwid kadagiti adipen ni Jehova. (Ara. 15:6, 28) Bayat nga umad-adani ti dakkel a rigat, napateg nga addaan ti tunggal agibumbunannag iti Pagarian iti natibker a relasion ken Jehova. Kasanoyo nga usaren ti tiempo a dati a mabusbusbos iti Panagadal iti Libro ti Kongregasion? Maiparegta iti amin nga usarenda daytoy a tiempo para iti panagdaydayawda kas pamilia. Ti nainsiriban a panangusar iti daytoy a tiempo ikkannatayo iti gundaway nga ad-adda pay a mangusig a naimbag iti naipaltiing a Sao ti Dios ken naan-anay a magunggonaan iti pannursurona.—Sal. 1:1-3; Roma 11:33, 34.
2. Kasano a mayurnos ti sangapamiliaan a panagdaydayaw iti rabii?
2 Sangapamiliaan a Panagdaydayaw iti Rabii: Maiparegta kadagiti ulo ti pamilia nga ibaklayda ti responsabilidad nga inted ni Jehova kadakuada, a siguraduenda a masurot ti makagunggona ken regular a programa ti panagadal iti Biblia kas pamilia. (Deut. 6:6, 7) Dagiti babbaro ken babbalasang nga awanan iti responsabilidad iti pamilia mausarda daytoy a tiempo para iti personal a panagsukimat ken panagadal iti Biblia. Napateg para kadatayo amin ti ‘gumatang iti nainggundawayan a tiempo’ para iti panagadal ken panagmennamenna tapno agtalinaedtayo a natibker iti naespirituan iti laksid dagitoy ‘nadangkes nga al-aldaw’ a pagbibiagantayo.—Efe. 5:15, 16.
3, 4. Ania dagiti naited a singasing no maipapan iti material a mabalintayo nga adalen, ken ania ti panggep ti panangadaltayo kadagita?
3 No Ania ti Adalen: Ti Watch Tower Publications Index wenno ti Watchtower Library iti CD-ROM matulongannakayo a mangbirok iti impormasion a mamagbalin a naragsak iti panagadalyo kas pamilia. Mabalin nga usigen dagiti pamilia dagiti artikulo iti Pagwanawanan, kas iti “Tulbek ti Naragsak a Pamilia,” “Isuroyo Dagiti Annakyo,” ken “Para Kadakayo nga Agtutubo.” Maysa pay, naglaon ti Agriingkayo! kadagiti serye ti “Agimtuod Dagiti Agtutubo” ken dadduma pay a makapainteres nga artikulo maipapan kadagiti nakaskasdaaw a parsua.
4 No saan nga agdardaras ti panagbasayo iti Biblia kas pamilia, maitukit iti isip ken puso dagiti amin a kameng ti pamilia dagiti nadiosan a prinsipio ken sursuro. (Heb. 4:12) Mabalinyo met a buyaen ken pagsasaritaan sagpaminsan dagiti video nga inaramid ti organisasion. Adu ti mabalin nga adalen ken mabalinyo a baliwbaliwan ti pamay-an ti panagadalyo. Apay a diyo saludsoden kadagiti kameng ti pamiliayo no ania ti kayatda nga adalen?
5. Apay a nakapatpateg para kadatayo ita ti maaddaan iti personal ken sangapamiliaan a panagadal iti Biblia?
5 No Apay a Napateg Ita: Makapagsaganatayo nga ‘agtakder a sititibker ken mangkita iti panangisalakan ni Jehova’ no patibkerentayo ti espiritualidadtayo. (Ex. 14:13) Kasapulan dagiti nagannak ti panangiwanwan ti Dios iti panangpadakkelda kadagiti annakda “iti tengnga ti nakillo ken tiritir a kaputotan.” (Fil. 2:15) Kasapulan dagiti annak ti tulong tapno masarangetda ti agrakrakayan a moralidad iti eskuelaanda. (Prov. 22:3, 6) Napateg met a patibkeren dagiti agassawa ti ‘tinallo a talida’ ken Jehova. (Ecl. 4:12) Gapuna, usarentayo a nainsiriban ti nabatbati a tiempo a mangpatibker iti bagbagitayo iti ‘kasasantuan a pammatitayo’!—Jud. 20.