Saludsod
◼ No kayat ti nobio ken nobia nga usaren ti Kingdom Hall para iti kasarda, ania dagiti nasken a pakisaritaanda kadagiti panglakayen?
Pakaidayawan ni Jehova dagiti kasar a nayurnos sigun kadagiti prinsipio iti Biblia. Nangnangruna a pudno dayta no maipapan kadagiti kasar iti Kingdom Hall gapu ta dagiti programa a maang-angay iti Kingdom Hall ket adda ipampamatmatna kadagiti tattao mainaig iti organisasiontayo. Tapno ‘amin a bambanag maaramid a sitatakneng ken sigun iti urnos,’ maitutop nga ilawlawag dagiti lokal a panglakayen ti sumagmamano a bambanag no adda agkasar a mangkiddaw nga usarenda ti Kingdom Hall.—1 Cor. 14:40.
Ti nobio ken nobia a mayat a mangusar iti Kingdom Hall para iti kasarda ket masapul nga agsurat iti komite ti serbisio ti kongregasion a mangus-usar iti dayta a Kingdom Hall. Masapul nga itedda a nasaksakbay ti suratda ken ikabilda no ania a petsa ken oras ti kayatda a panangusar iti Kingdom Hall. Laglagipenda koma a saan a balbaliwan dagiti panglakayen ti eskediul ti gimong ti kongregasion tapno laeng mausarda ti Kingdom Hall para iti kasarda. Malaksid iti dayta, masapul a nasayaat ti espiritualidad ti nobio ken nobia, agbibiagda maitunos kadagiti prinsipio iti Biblia ken kadagiti nalinteg a pagalagadan ni Jehova.
Tapno masigurado a ti kasar ket pakaidayawan ti Dios, masapul a makisarita ti nobio ken nobia iti komite ti serbisio tapno ilawlawagda dagiti urnos iti kasarda sakbay a mangaramidda iti pinal a desision. Nupay saan nga ipapilit dagiti panglakayen ti personal a kapanunotanda, masapul nga agtulnog ti nobio ken nobia no adda pabaliwan dagiti panglakayen gapu ta kuestionable dayta. Dagiti laeng musika a napili manipud iti Kingdom Melodies wenno dagiti masarakan iti pagkantaantayo ti mabalin nga ipatokar. Masapul met a paaprobaran ti aniaman a dekorasion a maikabil iti Kingdom Hall wenno ti panangbalbaliw iti urnos dagiti tugaw. No adda agala iti retrato wenno ag-video, saan koma a mangkissay dayta iti dignidad ti okasion. Mabalin nga ipalubos dagiti panglakayen ti agpraktis idiay Kingdom Hall no la ket ta saan a makasinga dayta kadagiti dadduma nga urnos ti kongregasion. Saan a mabalin ti agipaskil iti imbitasion iti information board. Nupay kasta, kabayatan ti Gimong ti Serbisio, mabalin nga iyanunsio dagiti panglakayen iti kongregasion ti maipapan iti maangay a kasar iti Kingdom Hall.
Nupay saan a maikalikagum a bautisado amin a karaman iti programa ti kasar, saan a maitutop nga iraman dagiti indibidual a saan a mayannurot kadagiti prinsipio ti Biblia ti kabibiagda wenno ti konduktada ket kuestionable iti imatang dagiti tumabuno. Maysa a panglakayen nga autorisado a mangasar, no adda, ti mangannong iti kasar. Yantangay dagiti panglakayen ket kualipikado a mannursuro iti Sao ti Dios, isuda ti nangnangruna a maiparbeng a mangilawlawag kadagiti Nainkasuratan a prinsipio nga agaplikar iti daytoy a napateg nga okasion.—1 Tim. 3:2.
Gapu ta ti kasar apektaranna met ti panangmatmat dagiti dadduma iti panglakayen a mangasar, masapul a maipakaammo kenkuana a nasaksakbay no ania dagiti urnos iti kasar. Kasaritana ti nobio ken nobia tapno ammuenna ti moral a konduktada kabayatan ti panagnobioda. Nasayaat no ti nobio ken nobia ibagada ti agpayso kenkuana, a dida agilimlimed. No dati a naasawaan ti maysa kadakuada, masapul a paneknekanna nga isu ket nawaya manen a makiasawa sigun iti Kasuratan ken sigun iti linteg. (Mat. 19:9) Ramanen daytoy ti panangipakita iti pinal a kasuratan ti diborsio.
No makikomunikar ken makikooperar a naan-anay ti nobio ken nobia kadagiti panglakayen, ti kasar ket agbalin a naragsak nga okasion para iti amin.—Prov. 15:22; Heb. 13:17.