Kabaelam ti Agbalin a Mannursuro!
1. Ania ti naisangsangayan nga oportunidad ti tunggal agibumbunannag iti Pagarian?
1 Ti maysa kadagiti makagunggona unay nga aspeto ti ministerio ket ti panangisuro iti kinapudno iti maysa a tao. Makaparagsak a kapadasan ti pannakakitatayo iti dayta a tao a mangipangpangag iti mensahe ti Pagarian ken ti panangtulongtayo kenkuana nga umadani iti Soberano iti uniberso. (Sant. 4:8) Kalat koma ti tunggal agibumbunannag iti Pagarian ti panangisuro iti maysa a tao a mabisbisin iti naespirituan ken ti pannakakita kenkuana a mangaramid kadagiti napateg a panagbalbaliw iti personalidad, panangmatmat, ken kababalinna.—Mat. 28:19, 20.
2. Apay nga agkedked dagiti dadduma a mangyadal iti Biblia, ken ania ti makatulong kadakuada a mangparmek iti dayta a parikut?
2 Agtalekka ken Jehova: Kadagiti napalabas a tiempo, dagiti matalek nga adipen pinagduaduaanda no kabaelanda nga aramiden ti trabaho a naipaannong kadakuada. Ti panagtalek ken Jehova a Dios ti nakatulong kada Moises, Jeremias, Amos, ken dadduma pay nga ordinario a tattao a mangikkat iti panagduadua ken kinaawan kompiansada a mangitungpal iti nagpateg a trabaho. (Ex. 4:10-12; Jer. 1:6, 7; Amos 7:14, 15) Uray ni apostol Pablo ket ‘nagurnong met iti tured.’ Kasano? Kinunana a “babaen [dayta] iti Diostayo.” (1 Tes. 2:2) Wen, makapagtalektayo amin nga ipaay ni Jehova ti tulong, sirib, ken bileg a kasapulantayo tapno makaikonduktatayo kadagiti nabunga a panangyadal iti Biblia.—Isa. 41:10; 1 Cor. 1:26, 27; 1 Ped. 4:11.
3, 4. Ania a panangsanay ti maipapaay kadatayo tapno matulongantayo a mangisuro iti Sao ti Dios?
3 Panagsanay: Sansanayennatayo ti Naindaklan nga Instruktortayo a ni Jehova a Dios babaen ti regular a programa ti naespirituan nga edukasion tapno agbalintayo a nalaing a mannursuro. (Isa. 54:13; 2 Tim. 3:16, 17) Aprobetsarem daytoy a panangsanay babaen ti panangaramidmo iti amin a kabaelam no adda dagiti oportunidad a mangpauneg iti pannakatarusmo iti Kasuratan ken mangparang-ay iti abilidadmo a mangisuro kadagiti kinapudno a linaon ti Biblia. Nupay daytoy ti kangrunaan a panggep ti Teokratiko nga Eskuelaan ti Panagministro ken ti Gimong ti Serbisio, masansanaytayo a mangisuro iti Sao ti Dios babaen dagiti amin a gimong iti kongregasion.
4 Ikagumaam ti agsursuro kadagiti simple a pamay-an ti panangisuro uray kadagiti nauneg a naespirituan a kinapudno. Kastoy ti kuna ti panid 227 ti libro nga Eskuelaan ti Panagministro: “Masapul a matarusam a naimbag ti topikom tapno maipaawatmo dayta kadagiti dadduma.” Makatulong ti panagkomento kadagiti gimong tapno saantayo a malipatan dagiti kangrunaan a punto a mausartayto iti masanguanan. Gapuna, agsaganaka a naimbag, ket maaddaanka iti dakdakkel a kompiansa ken rumang-ay ti abilidadmo a mangisuro.
5. Ania a kanayonan a pannakasanay ti maaw-awattayo iti uneg ti kongregasion a makatulong kadatayo a rumang-ay kas mannursuro?
5 Sipud pay idi un-unana, awan duadua a nakasursuro dagiti Kristiano a ministro manipud iti maysa ken maysa bayat ti pannakiramanda iti trabaho a panagaramid iti adalan. (Luc. 10:1) No mabalbalin, makikaduaka iti aduan kapadasan nga agibumbunannag, a pakairamanan dagiti payunir, panglakayen, ken agdaldaliasat a manangaywan, a mapan mangyadal iti Biblia. Iti panangilawlawagda kadagiti kinapudno a linaon ti Kasuratan, paliiwem no kasanoda nga usaren dagiti simple nga ilustrasion ken ti dadduma pay a katulongan iti panangisuro a masarakan kadagiti publikasion nga us-usarentayo a mangyadal. Dumawatka kadagiti singasing no kasano a mapasayaatmo ti panangisurom. (Prov. 1:5; 27:17) Apresiarem ti panangsanay a maaw-awatmo kadagiti kakabsat ta iti kinapudnona, ti Dios ti mangsansanay kenka.—2 Cor. 3:5.
6. Ania ti kasapulan tapno ti maysa a tao ket agbalin a mannursuro iti Sao ti Dios?
6 Agtalekka ken Jehova ken aprobetsarem ti panangsanay nga ipapaayna. Ikararagmo a tulongannaka a rumang-ay iti naespirituan. (Sal. 25:4, 5) Iti kasta, maaddaanka met iti rag-o a tumulong iti maysa a tao nga agbalin a kas kenka, a mannursuro iti Sao ti Dios!