Agtalinaedka iti Ayat ti Dios

1. Ania ti nakairantaan ti Agtalinaedka iti Ayat ti Dios?

¹ Magagarantay la ketdin a mangadal iti baro a libro nga Agtalinaedka iti Ayat ti Dios iti Panagadal ti Kongregasion iti Biblia a mangrugi iti lawas ti Pebrero 23! Ti surat ti Bagi a Manarawidwid para iti amin a mangay-ayat ken Jehova ket agngudo iti kastoy a sasao: “Sipapasnek a namnamaenmi a tulongannaka daytoy a publikasion nga agtultuloy nga agbiag a maitunos iti kinapudno ket iti kasta, makapagtalinaedka iti ‘ayat ti Dios . . . maipaay iti agnanayon a biag.’—Judas 21.”

2. Kadagiti ania a benneg ti biag a makatulong kadatayo daytoy a baro a libro?

² No Ania ti Namnamaentayo: Kasano nga agaplikar dagiti prinsipio ti Biblia no iti pannakitimpuyog, panaglinglingay, panagraem iti autoridad, ugali, pannakiasawa, panagsasao, ken kustombre? Masukog ti konsiensiatayo maitunos kadagiti nangato a pagalagadan ti kinalinteg a nailanad iti Sao ti Dios. (Sal. 19:7, 8) Bayat nga umun-uneg ti pannakaawattayo iti wagas ti panagpampanunot ni Jehova, magutugottayo nga agtulnog iti amin a benneg ti biagtayo gapu iti tarigagaytayo a mangay-ayo kenkuana.—Prov. 27:11; 1 Juan 5:3.

3. Apay a pagreggetantayo ti agkomento iti panagadal iti tunggal lawas?

³ Determinadoka Koma a Makipaset: Bayat ti panagsaganam, aramidem a kalat nga idaydayaw ti Dios iti tengnga dagiti naguummong a tattaona. (Heb. 13:15) Daytoy a baro a publikasion ket sangsangkamaysa nga adalen ti intero a kongregasion. Gapu ta ababa laeng ti maadal iti tunggal lawas, ad-adda a maisaganatayo a naimbag ti material, a mangted kadatayo iti kompiansa a mangiranud iti naadaltayo. Dagiti naisagana a naimbag ken ababa a komentotayo ket mangparegta iti ayat ken nasayaat nga ar-aramid ken mangparayray iti makaisuro a panangusig iti material. (Heb. 10:24) Kanayonanna, maan-anay ti rag-otayo bayat nga iyebkas ti tunggal maysa ti pammatina.

4. Apay a nagpateg nga agtulnogtayo kadagiti bilin ni Jehova?

⁴ Iti maudi a rabii ni Jesus ditoy daga kas tao, inlawlawagna nga adda pakainaigan ti panagtulnog kadagiti bilin ni Jehova iti panagtalinaed iti ayat ti Dios. (Juan 15:10) Iti tulong ti libro nga Ayat ti Dios, agbalintayo nga ad-adda a determinado a mangyaplikar kadagiti prinsipio ti Biblia iti inaldaw a biagtayo, iti kasta, ‘makapagtalinaedtayo iti ayat ti Dios.’—Jud. 21.