Espesial a Kampania a Panangyawis iti Memorial!
1. Mangrugi inton Marso 21, 2009, anianto ti aramiden dagiti agibumbunannag iti Pagarian iti intero a lubong, ken apay?
1 Inton Huebes, Abril 9, 2009, agtataripnong dagiti agdaydayaw ken Jehova a Dios iti intero a lubong tapno laglagipenda ti katan-okan nga ebkas ti ayat agpaay iti sangatauan. (Roma 5:6-8) Namnamaentayo a minilion nga interesado ti makaduatayto a manglaglagip iti ipapatay ni Jesus. Addanto espesial nga imbitasion mainaig iti Memorial a maiwaras iti intero a lubong mangrugi inton Marso 21.
2. Ania dagiti masapul a laglagipenyo no itukonyo ti imbitasion?
2 Bambanag a Laglagipen: Usarenyo a naimbag dagiti ladawan, saludsod, ken naisitar a teksto iti imbitasion. Kas pagarigan, mabalinyo nga ipakita ti ladawan iti sango sa kunaenyo: “Kayatkayo nga awisen a makipanglaglagip kadakami iti ipapatay ni Jesus a maangay inton Huebes, Abril 9, 2009.” Kalpasanna, ipakitayo ti paulo ti imbitasion ken dagiti salsaludsod iti babana. Diyo liplipatan nga ibaga iti bumalay a mabalinna nga ikuyog ti pamiliana ken ti dadduma pay a kayatna nga awisen.
3. Kasano ti mabalin a panangsurnadyo kadagiti nasapsapa a naikkanyo iti imbitasion?
3 No nalawa ti teritoria ti kongregasionyo, mabalin nga ibaga dagiti panglakayen nga ibatianyo lattan iti imbitasion dagiti pagtaengan a saanyo a nadanon dagiti bumalayna. Kadagiti ngudo ti lawas, itukonyo dagiti magasin agraman ti imbitasion. Ikagumaanyo nga awisen dagiti sarsarungkaran, iyad-adalan, kakabagian, kaeskuelaan, katrabahuan, kaarruba, ken dadduma nga am-ammoyo. Idi napan a tawen, maysa a kabsat a babai ti nangawis iti 30 a kakabagianna ken masansan nga impalagipna kadakuada ti kinapateg ti okasion. Anian a ragsakna ta 25 kadakuada ti timmabuno ket 4 ti nagpayadal iti Biblia idi agangay!
4. Ania a panagplano ti aramidentayo itan, ken apay?
4 Agplanokayo Itan: Adu nga agibumbunannag ti mabalin a mangbusbos iti ad-adu a tiempo a makiraman iti ministerio bayat ti Marso ken Abril. No adda annakyo wenno iyad-adalanyo iti Biblia a rumangrang-ay iti naespirituan, mabalin a nagsayaat a gundaway daytoy tapno agbalinda a di bautisado nga agibumbunannag. Itan ti tiempo a rugiantayo ti agplano tapno naan-anay a makipasettayo iti daytoy a kampania a mangyawis iti pannakalaglagip ti dua a katan-okan nga ebkas ti ayat.—Juan 3:16; 15:13.