Saludsod

◼ Maitutop kadi nga usaren ti kongregasion wenno dagiti indibidual ti logo dagiti legal a korporasion nga us-usaren dagiti Saksi ni Jehova?

Ti logo ket maysa a nagan, simbolo, wenno marka a nadisenio para iti masnup ken nalaka a mailasin a pakabigbigan. Ti logo a Watch Tower irepresentarna ti Watch Tower Bible and Tract Society of Pennsylvania ken ti dadduma pay a korporasion nga us-usaren ti organisasion. Ti korporasion a nanaganan iti Christian Congregation of Jehovah’s Witnesses us-usarenna ti logo a ladawan ti nakalukat a Biblia nga adda iti letterhead. Sabali met ti logo dagiti dadduma a korporasion nga us-usaren dagiti Saksi ni Jehova.

Saan a rumbeng nga usaren dagiti kongregasion wenno indibidual dagiti logo wenno nagan dagiti legal a korporasion ti organisasion, wenno dagiti kaasping unay dagita, kadagiti Kingdom Hall, karatula, letterhead, personal a bambanag, ken dadduma pay. Ti panangusar kadagita a logo ti organisasion ket mabalin a mangriro kadagiti opisial ti gobierno, agibumbunannag, ken dadduma pay maipapan iti pudno a pakainaigan ti kongregasion kadagiti legal a korporasion ti organisasion. Kasta met a nalabit mapagkamalian dagiti surat a kas inaprobaran wenno impatulod ti sangalubongan a hedkuarter wenno ti sanga nga opisina.

Saan koma a maikabil ti logo a Watch Tower, wenno ti kaasping dayta, kadagiti Kingdom Hall a sumaruno a maibangon uray no ti Kingdom Hall ket kukua ti korporasion a Watch Tower. Saan a maikalikagum kadagiti kongregasion nga addaan iti logo ti Kingdom Hall-da a baliwanda a dagus dagiti marka wenno disenioda, yantangay dakkel a panangretubar, adu a tiempo, pigsa, ken kuarta ti ramanen dayta. Ngem no nalaka ken apagbiit laeng a mabaliwanyo, tingitingenyo no mabalinyon nga aramiden dayta. Ngem no saan a nalaka nga aramiden, mabaliwanto laengen inton maretubar ti pasdek wenno ti markana.