Ti Ministeriotayo—Ebkas ti Ayattayo iti Dios

1. Ti ayat iti Dios ti nangtignay ken Jesus a mangaramid iti ania?

¹ Ayat ti nangtignay ken Jesus a mangitungpal iti ministeriona. Ti tunggal aspeto ti ministerio ni Jesus ket natibker a pammaneknek iti ayatna ken Jehova. Kinuna ni Jesus: “Tapno maammuan ti lubong nga ay-ayatek ti Ama, no kasano a ti Ama inikkannak iti bilin nga aramiden, kasta ti ar-aramidek.” (Juan 14:31) Kas pasurot ni Jesus, addaantayo met iti pribilehio a mangiparangarang iti nauneg nga ayattayo iti Dios babaen ti ministeriotayo.—Mat. 22:37; Efe. 5:1, 2.

2. Kasano a ti panagayat ken Jehova apektaranna ti ministeriotayo?

² “Masantipikar Koma ti Naganmo”: No sireregta nga aprobetsarentayo ti tunggal oportunidad a mangisarsarita kadagiti sabsabali iti maipapan ken Jehova ken iti Pagarianna, ipakpakitatayo nga ay-ayatentayo ti Dios ken tumultulongtayo iti pannakasantipikar ti naganna. (Sal. 83:18; Ezeq. 36:23; Mat. 6:9) Kas iti ministerio ni Jesus, ti ministeriotayo agtultuloy nga ipakitana ti napasnek a tarigagaytayo a masantipikar ti nagan ni Jehova ken matungpal ti pagayatanna.—Mat. 26:39.

3. Iti ania a wagas a ti ayattayo ken Jehova tulongannatayo a mangdaer kadagiti lapped?

³ Ti Ayat Tignayennatayo a Mangdaer Kadagiti Lapped: Ti ayat ken Jehova ringbawanna ti amin a lapped. (1 Cor. 13:4, 7) Naipasango ni Jesus iti nagduduma a kasasaad iti biag a mabalin a manglapped kenkuana a mangitungpal iti ministeriona. Ngem idi naipasango kadagiti lapped, ti nauneg nga ayat ken tarigagayna a mangaramid iti pagayatan ni Jehova ti nakatulong kenkuana a mangdaer iti aniaman a parikut. (Mar. 3:21; 1 Ped. 2:18-23) Maipaspasangotayo met iti adu a karit, ket ti ayattayo iti Dios ti tumulong kadatayo a mangdaer kadagita. No siiinget a surotentayo ti ulidan nga impasdek ni Kristo, mabalin a tumured ken saantayo a maupay a mangitungpal iti ministeriotayo. Nupay maapektarantayo iti ibubusor ti pamilia, kumapkapuy a salun-at, panaglakay wenno panagbaket, wenno iti kinaaleng-aleng dagiti tattao, saan a dayta ti mangpasardeng kadatayo a mangipakita iti ayattayo ken Jehova babaen ti panangaramidtayo iti amin a kabaelantayo nga agbalin nga epektibo iti ministerio.

4. Ania a pribilehio ti naadda kadatayo gapu iti ayattayo ken Jehova?

⁴ Nabileg ti ayat, ken naparaburantayo iti abilidad a mangiparangarang iti naimpusuan nga ayattayo iti Dios babaen ti ministeriotayo. (1 Cor. 13:13) Bayat a sipapartak nga umad-adani ti tiempo a pannakasantipikar ti nagan ni Jehova iti agnanayon, sapay koma ta ti ‘ayattayo umadu koma nga ad-adda pay.’—Fil. 1:9; Mat. 22:36-38.