Kasano ti Isusungbatmo?

1. Apay a masapul a tuladentayo ti pamay-an ni Jesus no iti panangsungbat kadagiti saludsod?

¹ Agingga ita, masmasdaaw pay laeng dagiti tattao iti epektibo a pamay-an ti panangsungbat ni Jesus kadagiti saludsod. No makasabettayo iti nagduduma a saludsod bayat a mangaskasabatayo, nasayaat a tuladentayo ti pamay-an ni Jesus.—1 Ped. 2:21.

2. Ania ti makatulong tapno masungbatantayo a sieepektibo ti maysa a saludsod?

² Umimdengka nga Umuna: Inkabilangan ni Jesus ti panangmatmat ti agsalsaludsod. No dadduma, kasapulan nga agimtuodtayo tapno masierto no ania a talaga ti pampanunoten ti maysa a tao. Mabalin a daydiay mangisaludsod iti “Mamatika kadi ken Jesus?” ket kayatna laeng a maammuan no apay a dimo ramrambakan ti Krismas. No mailasinmo ti talaga a pakaseknan ti agsalsaludsod, makaipaayka iti nasaysayaat a sungbat.—Luc. 10:25-37.

3. Ania dagiti katulongantayo a mangbirok kadagiti makapnek a Nainkasuratan a sungbat?

³ Usarem ti Sao ti Dios No Sumungbatka: Masansan a kasayaatan nga ipakita no ania ti sungbat ti Biblia iti maysa a saludsod. (2 Tim. 3:16, 17; Heb. 4:12) Ti libro a Pannakirinnason ken “Dagiti Topiko Ti Biblia a Pagsasaritaan” iti Baro a Lubong a Patarus ti Nasantuan a Kasuratan ket napaneknekan a makatulong tapno makaipaay iti umiso a sungbat. Uray no ti agsalsaludsod ket saan a mamati iti Biblia, mabalin nga ibagam a sitataktika no ania ti isursuro ti Kasuratan. Paregtaem dayta a tao nga usigenna a naimbag ti nasuboken a sirib a masarakan iti Biblia. No tuladem ni Jesus, ti sungbatmo ket ‘kaslanto kadagiti mansanas a balitok kadagiti kitikit a pirak’—nadayaw, nasayaat, ken napateg.—Prov. 25:11.

4. Kaano a nasaysayaat no saantay a sungbatan ti tunggal saludsod?

⁴ Masapul Kadi a Sungbatantayo ti Tunggal Saludsodda? No saanmo nga ammo ti sungbat, saanka koma a mabain a mangibaga iti: “Diak ammo, ngem mabalinko ti agsukimat mainaig iti saludsodmo ket inton agsubliak, ibagakto kenka no ania ti nasukimatko.” Ti kasta a kinapakumbaba ken pannakaseknan, tignayenna ti bumalay a mangpadaan iti sumaruno nga isasarungkarmo. No madlawmo a ti saludsod ket naggapu iti maysa a bumusbusor a kayatna laeng ti makirikiar, tuladem ni Jesus babaen ti pananglimitarmo iti sungbatmo. (Luc. 20:1-8) Umasping iti dayta, no ti maysa ket talaga a saan nga interesado iti kinapudno ken kayatna laeng ti makidebate, sidadayaw nga ingudomon ti saritaan ken usarem laengen ti tiempom a mangbirok kadagidiay interesado.—Mat. 7:6.

5. Ania a pagwadan ti impasdek ni Jesus iti panangsungbat kadagiti saludsod?

⁵ Ammo ni Jesus a napateg ti panagpannuray ken Jehova no iti panangitungpal iti annongen a ‘panangsaksi iti kinapudno,’ a pakairamanan ti panangsungbat kadagiti saludsod dagiti tattao a sipapasnek nga agbirbirok kadagiti sungbat. (Juan 18:37) Anian a pribilehio ti mangtulad ken Jesus iti panangsungbat kadagiti saludsod dagidiay “siuumiso nga agannayas iti agnanayon a biag”!—Ara. 13:48.