Mabalin nga Epektibo ti Panangasaba Babaen iti Telepono
1. Apay a napateg a paset ti ministerio ti panangasaba babaen iti telepono?
1 Apay a napateg met ti panangasaba babaen iti telepono? Agsipud ta maysa daytoy kadagiti pamay-an a tumulong kadagiti tattao a maaddaan iti umiso a pannakaammo tapno magun-odda ti pannakaisalakan. (2 Ped. 3:9) Nupay ti panangasaba iti binalaybalay ti kangrunaan a pamay-an iti panangideklara iti naimbag a damag maipapan iti Pagarian, kayattayo a gundawayan dagiti dadduma a pamay-an tapno makasaritatayo dagiti tattao a saantay a madandanon kadagiti pagtaenganda.—Mat. 24:14; Luc. 10:1-7; Apoc. 14:6.
2. Kasano ti pannakaorganisar ti panangasaba babaen iti telepono?
2 No Kasano ti Pannakaorganisarna: No kasano nga adda dagiti urnos iti serbisio iti tay-ak para iti panagbalaybalay, adda met nayurnos a teritoria para iti panangasaba babaen iti telepono. Mabalintayo nga aramiden daytoy a bukbukod wenno kaduatayo ti bassit a grupo a buklen ti nalabit dua wenno tallo nga agibumbunannag. Naulimek koma ti lugar a pakaaramidan dayta tapno awan ti makasinga. Adun ti nakapadas a nasayaat no adda lamisaan a pakaiparabawan dagiti kasapulanda a literatura a gagangay a maus-usar iti panangasaba iti binalaybalay.
3. Ania ti rumbeng a laglagipentayo no mangaskasabatayo babaen iti telepono?
3 No Kasano ti Mangasaba Babaen iti Telepono: No mangasabatayo babaen iti telepono, agsaotayo koma iti wagas a kasla makisarasaritaka laeng. Dagiti agdadamo mabalin a basaenda dagiti naisurat a presentasionda ngem aramidenda koma dayta iti wagas a kasla makisarsarita. Makatulong dagiti introduksion a masarakan iti Ti Ministeriotayo iti Pagarian, iti libro a Pannakirinnason, ken iti tract a Kayatmo Kadi a Maammuan ti Kinapudno? No sangalem ti presentasionmo, mangidatagka iti tema, mangibangonka iti saludsod, ken mangisaganaka iti sumagmamano a teksto a mangipaay iti sungbat. Kadawyan a mangipaimaka kadagiti publikasion a maituktukon iti panagbalaybalay. Usigem dagiti sumaganad a palagip: Kalmado ken natanang koma ti panagsaom. Masapul a nadayaw, naanus ken mannakigayyemka ta madlaw dayta ti kasarsaritam iti telepono. Imdengam ti kapanunotan ti bumalay ken iyebkasmo ti apresasionmo iti dayta. Saanmo a dakdakamaten ti maipapan iti panangted iti donasion di la ket ta ipagarup ti kasarsaritam nga agur-ur-orka babaen iti telepono.
4. Ania ti maitulong ti panangasaba babaen iti telepono iti pannakawanas ti naituding a teritoriatayo?
4 Mabalin a ti makasaritam iti telepono ket maysa a masakit wenno baldado wenno maysa a saan a matumtumpongan iti balayda gapu iti trabahona. Agnanaed met dagiti dadduma kadagiti subdibision wenno kadagiti apartment a nainget ti pannakabantayna. Gapuna, ikagumaantayo koma nga usaren ti epektibo a wagas ti panangasaba babaen iti telepono tapno naan-anay a maitungpaltayo ti ministeriotayo.