Panangsarungkar Kadagiti Interesado—Kaano?
1. Ania ti ramanen ti panagaramid iti adalan?
1 Ti panagaramid iti adalan ramanenna ti panangsarungkar iti siasinoman a mayat nga agsursuro iti maipapan iti Pagarian ni Jehova. (Mat. 28:19, 20) Ti kasayaatan a tiempo ti panagsarungkar ket masansan nga agpannuray iti eskediultayo ken iti eskediul ti interesado. Apay a nasken nga agsarungkartayo iti kabiitan a tiempo kalpasan ti damo a pannakisaritatayo?
2, 3. Apay nga ikagumaantayo ti agsarungkar iti kabiitan a tiempo?
2 Apay nga Agsarungkartayo a Dagus? Dandanin mairingpas ti trabahotayo a panangikasaba iti “daytoy naimbag a damag ti pagarian,” ken asidegen ti panungpalan daytoy a sistema ti bambanag. (Mat. 24:14; 1 Ped. 4:7) Gapuna, bayat nga adda pay laeng ti nabatbati nga ‘aldaw para iti pannakaisalakan’ dagiti interesado, nasken nga itungpaltayo ti balakad a ‘sigaganetget a panangikasaba iti sao.’ Ramanen daytoy ti panagsarungkar iti kabiitan a tiempo kadagiti nangipakita iti interes tapno maparayray ti interesda.—2 Cor. 6:1, 2; 2 Tim. 4:2.
3 Determinado ni Satanas a mangparut iti bin-i ti Pagarian a mabalin a naimulatayo iti puso ti interesado. (Mar. 4:14, 15) Dagidiay nangipakita iti interes ket masansan nga uyawen dagiti miembro ti pamiliada, katrabahuanda, ken dadduma pay. Ti panagsarungkar a dagus tulongannatayo a mangparayray iti interes sakbay nga agballigi dagiti dadduma a mangpabaaw iti dayta.
4. Iti damo a pannakisaritatayo, ania ti aramidentayo tapno adda panggapuantayo nga agsarungkar?
4 Makitulagkayo: Iti damo a pannakisaritayo, kasayaatan a sakbay nga agpakadakayo, makitulagkayo no ania nga aldaw ken oras ti panagsubliyo. Mangibatikayo iti saludsod a sungbatanyonto iti sumaganad nga isasarungkaryo. Napateg nga isuratyo no ania ti napagsaritaanyo ken no kaano ti panagsubliyo. No nawaya ti eskediulyo, mabalin nga ibagayo nga agsublikayto iti kabigatanna wenno di agbayag kalpasan dayta. No ti damo a pannakisaritayo ket ngudo ti lawas ken no ti interesado ket agtartrabaho iti lawlawasna, nalabit nga umanamong a masarungkaran iti sumaganad a ngudo ti lawas. No inkariyo nga agsublikayo, siguraduenyo a tungpalen dayta.—Mat. 5:37.
5. Kasanotayo a maitungpal ti trabaho a panagaramid iti adalan nga impaannong ni Jesus no ditay itungtungkua ti agsarungkar?
5 Addaantayo kadagiti nagsayaat a rason a mangsarungkar kadagiti interesado iti kabiitan a tiempo. Makitulagtayo ngarud ken agsarungkartayo a dagus gapu ta ‘ababan ti nabati a tiempo.’ (1 Cor. 7:29) No sarungkarantayo iti kabiitan a tiempo dagidiay nangipakita iti interes iti mensahe maipapan iti Pagarian, mabalin a nasaysayaat ti ibunga dagiti panagreggettayo.