Saksitayo iti Amin a Tiempo
1. Ania ti maadaltayo maipapan iti panangasaba ni Jesus iti maysa a babai iti abay ti bubon?
1 Adu nga oras a nagnagna ni Jesus. Nabannog ken mawawen. Bayat a napan gimmatang dagiti adalanna iti taraon, nagtugaw iti abay ti bubon iti ruar ti siudad ti Samaria tapno aginana. Saan a plano ni Jesus ti mangasaba idiay Samaria. Dumalan laeng iti dayta a lugar bayat ti panagturongna idiay Galilea tapno ituloyna ti ministeriona sadiay. Nupay kasta, ginundawayanna a kinasabaan ti maysa a babai nga agsaksakdo. (Juan 4:5-14) Apay? Ni ngamin Jesus ket kanayon a “matalek ken napudno a saksi” ni Jehova. (Apoc. 3:14) Matuladtayo ni Jesus no agtignaytayo kas Saksi ni Jehova iti amin a tiempo.—1 Ped. 2:21.
2. Ania ti aramidentayo tapno nakasaganatayo a mangasaba iti di pormal?
2 Nakasaganakayo Koma: Nakasaganatayo a mangasaba iti di pormal no kanayon a mangitugottayo kadagiti literatura. Adu nga agibumbunannag ti kanayon a mangitugtugot iti tract ket ipaimada dayta kadagiti aglaklako, trabahador iti gasolinaan, ken kadagiti dadduma pay a makasaritada iti agmalem. (Ecl. 11:6) Ti maysa a kabsat a babai a masansan nga agbibiahe sigsiguraduenna a kanayon nga adda iti bagna ti bassit a Biblia ken ti libro nga Isursuro ti Biblia sa ikagumaanna a kasarita ti asinoman a makatugawna.
3. Kasanotayo a mabalin nga irugi ti saritaan?
3 Panangirugi iti Saritaan: No mangasabatayo iti di pormal, saan a kasapulan a dakamatentayo a dagus ti maysa a Nainkasuratan a topiko. Saan a rinugian ni Jesus ti pannakisaritana iti babai iti abay ti bubon babaen ti panangyam-ammona iti bagina kas ti Mesias. Nagkiddaw laeng iti danum, banag a nangtukay iti interes ti babai. (Juan 4:7-9) Kasta ti ar-aramiden ti maysa a kabsat a babai tunggal mapagsaludsodan no naragsakan met laeng a nangselebrar iti Krismas wenno Baro a Tawen. Imbes nga ibagana a saan a makiramraman kadagiti kasta nga okasion gapu ta isu ket maysa a Saksi ni Jehova, kunaenna, “Saanak a nagselebrar.” Gagangay a mapasarunuan dayta iti saludsod nga apay ket dayta ti mangted iti kabsat iti gundaway a mangasaba.
4. Apay a makapabileg kadakayo ti Mateo 28:18-20?
4 Nupay nairingpasen ni Jesus ti naregta a panangasabana ditoy daga, interesado latta iti trabaho a panangasaba a kas iti inaramidna idi. (Mat. 28:18-20) Gapuna, kas iti Ulidantayo a ni Jesus, datayo ket Saksi a nakasagana a mangisarsarita iti pammatitayo iti publiko iti aniaman a tiempo.—Heb. 10:23.