‘Daytoy Naimbag a Damag Maikaskasabanto’!
1. Kasanotayo nga ammo nga awan ti makapasardeng iti trabaho a panangasaba?
1 Awan a pulos ti makapasardeng ken Jehova a mangitungpal iti pagayatanna. (Isa. 14:24) Nupay kasla imposible a maparmek ti ukom a ni Gideon ken ti 300 a buyotna dagiti 135,000 a Midianita, kinuna kenkuana ni Jehova: “Pudno unay nga isalakanmonto ti Israel manipud dakulap ti Midian. Saan kadi nga ibaonka?” (Uk. 6:14) Ania a trabaho ti supsuportaran ni Jehova ita? Kinuna ni Jesus: “Daytoy naimbag a damag ti pagarian maikaskasabanto iti intero a mapagnaedan a daga.” (Mat. 24:14) Awan ti siasinoman a makapasardeng iti pannakaitungpal daytoy a trabaho!
2. Apay a manamnamatayo a ni Jehova tulongannatayo kas indibidual iti ministeriotayo?
2 Tulongannatayo ni Jehova kas Indibidual: Nupay manamnamatayo a pagballigien ni Jehova dagiti Saksina kas maysa a grupo, manamnamatayo kadi met a tulongannatayo kas indibidual? Narikna ni apostol Pablo nga isu ket tinulongan a mismo ni Jehova babaen ti Anakna, a ni Jesus, idi panawen a kasapulanna dayta. (2 Tim. 4:17) Makapagtalektayo ngarud a bendisionan met ni Jehova ti panagreggettayo kas indibidual a mangitungpal iti pagayatanna.—1 Juan 5:14.
3. Kadagiti ania a kasasaad a tulongannatayo ni Jehova?
3 Maib-ibus kadi ti pigsayo a mangasaba gapu kadagiti inaldaw a pakaringgoran iti biag? “Isu mangted iti bileg iti daydiay nabannog.” (Isa. 40:29-31) Makapaspasarkayo kadi iti pannakaidadanes wenno ibubusor? “Ipalladawmo ti dadagsenmo ken Jehova a mismo, ket isu saranayennakanto.” (Sal. 55:22) Awan kadi ti kompiansayo a mangasaba no dadduma? “Mapanka, ket siak addaakto iti ngiwatmo.” (Ex. 4:11, 12) Limitado kadi ti magapgapuananyo iti ministerio gapu ta nakapuy ti salun-atyo? Ipatpateg ni Jehova ti amin-kararua a panagreggetyo, kasanoman kabassit dayta.—1 Cor. 3:6, 9.
4. Ania ti epektona kadatayo ti panagtalek ken Jehova?
4 Ti ima ni Jehova “isu daydiay nayunnat, ket siasino ti makaibaw-ing iti dayta?” (Isa. 14:27) Bayat a mangin-inanamatayo a bendisionan ni Jehova ti ministeriotayo, sapay koma ta agtultuloytayo a mangasaba “a situtured babaen ti autoridad ni Jehova.”—Ara. 14:3.