“Dika Agbuteng”

1. Ania dagiti karit nga umarngi kadagiti napasaran ni Jeremias ti mabalin a pakaipasanguantayo?

¹ Idi nadutokan ni Jeremias nga agserbi kas propeta, ti panagriknana idi damo ket saanna a kabaelan dayta. Ngem impanamnama kenkuana ni Jehova, “dika agbuteng,” sa siaasi a pinatibkerna a mangitungpal iti annongenna. (Jer. 1:6-10) Iti kaaldawantayo, mabalin a ti kinamanagbabain wenno kinaawan kompiansa ti mangapektar iti pannakiramantayo iti ministerio. Agkedkedtayo a mangasaba no dadduma gapu ta mabutengtayo iti reaksion wenno iti makuna dagiti tattao kadatayo. Kasanotayo a maparmek ti buteng, ken ania dagiti itdenna a bendision?

2. Kasano a makatulong ti panagsagana tapno maksayan ti butengyo iti ministerio?

² Agsagana a Nasaksakbay: Maksayan ti butengtayo no agsaganatayo a naimbag. Kas pagarigan, nakasaganatayo a sumungbat kadagiti bumalay no repasuentayo a nasaksakbay dagiti gagangay a panggupedda iti saritaan. (Prov. 15:28) Bayat ti sangapamiliaan a panagdaydayawyo, nasayaat no ensayuenyo ti aramidenyo no maipasangokayo kadagiti nadumaduma a karit idiay eskuelaan ken iti ministerio.—1 Ped. 3:15.

3. Kasano a ti panagtalek ken Jehova tulongannatayo a mangparmek iti buteng?

³ Agtalek ken Jehova: Sigurado a maparmektayo ti buteng no agtalektayo iti Diostayo. Impanamnama ni Jehova a tulongannatayo. (Isa. 41:10-13) Dayta ti kasayaatan a mangpatalged iti riknatayo. Maysa pay, impanamnama ni Jesus nga uray adda tumaud a di ninamnama a situasion, tulongannatayo ti nasantuan nga espiritu ti Dios a mangsaksi iti nasayaat a pamay-an. (Mar. 13:11) Gapuna, dumawatkayo iti nasantuan nga espiritu ni Jehova babaen ti regular a panagkararag.—Luc. 11:13.

4. Ania dagiti bendision nga itden ti panagtalinaed a naregta iti ministerio iti laksid dagiti karit?

⁴ Dagiti Bendision: No naregtatayo latta iti ministerio iti laksid dagiti karit, natibtibkertayto a mangsaranget kadagiti suot. Mapatanortayo ti bileg ken tured—dagiti kualidad nga adda kadagidiay napno iti nasantuan nga espiritu. (Ara. 4:31) Kanayonanna, no parmekentayo ti buteng babaen ti tulong ni Jehova, bumileg ti pammatitayo ken ti panagtalektayo iti mangisalakan a takkiagna. (Isa. 33:2) Makariknatayo pay iti rag-o ken pannakapnek gapu ta ammotayo a maay-ayotayo ti nailangitan nga Amatayo. (1 Ped. 4:13, 14) Awan ngarud ti panggapuantayo nga agbuteng a mangideklara a situtured iti mensahe maipapan iti Pagarian ken kanayon nga agtalektayo iti tulong ni Jehova!