Pagtuladan a Presentasion

Panangirugi iti Panagadal iti Biblia iti Umuna a Sabado iti Hulio

“Adu ti mangulit-ulit kadagitoy a sasao iti Kararag ti Apo: ‘Umay koma ti pagariam. Maaramid koma ti pagayatam, kas sadi langit, kasta met iti daga.’ Ammoyo kadi no ania dayta a Pagarian? [Palubosanyo a sumungbat.] Mangted iti pamalatpatan daytoy a teksto iti Biblia.” Basaenyo ti Daniel 2:44 sa ipaimayo ti Hulio 1 a ruar Ti Pagwanawanan. Basaen ken pagsaritaanyo ti material iti umuna a subtitulo iti panid 16. Itukonyo dagiti magasin ken ibagayo nga agsublikayto tapno usigenyo ti sungbat ti sumaruno a saludsod.

Ti Pagwanawanan Hulio 1

“Gapu ta ababa ti biag ken napno iti parikut, adu ti mangpampanunot no ania ti panggep ti biag. Napampanunotyo kadin dayta? [Palubosanyo a sumungbat.] Ikarkari ti Biblia a ti biag ket saan nga agnanayon a kastoy. [Basaenyo ti Apocalipsis 21:4.] Ilawlawag daytoy a magasin ti panggep ti Dios iti daga ken ibinsabinsana ti sumagmamano a banag a mabalintayo nga aramiden tapno maaddaan iti pudpudno a panggep ti biagtayo uray pay itan.”

Agriingkayo! Hulio

Mangdakamatkayo iti trahedia a nabiit pay a napasamak sa ibagayo: “Iti panagkunayo, apay nga impalubos ti Dios a mapasamak dagitoy? [Palubosanyo a sumungbat.] Sigun iti Biblia, maasian ti Dios kadagiti agsagsagaba. [Basaenyo ti Exodo 3:7.] Ibaga pay ti Biblia no apay nga impalubos ti Dios ti panagsagaba ken mabiiten a pagpatinggaenna dayta iti agnanayon. Ilawlawag daytoy a magasin no kasano.”