Ar-aramidenyo Kadi ti Amin nga Agsursuro Manipud ken Jehova?

1. Ania ti panangmatmat ni Jehova iti edukasion?

¹ Ni Jehova a ‘Naindaklan a Manangisuro,’ kayatna a masursuruantayo. (Isa. 30:20) Isu ket nangrugi a mangisuro idi pinarsuana ti inauna nga Anakna. (Juan 8:28) Kalpasan ti iyaalsa ni Adan, saan a nagsardeng a mangisuro ni Jehova, no di ket siaayat a nangipaay iti instruksion kadagiti imperpekto a tattao.—Isa. 48:17, 18; 2 Tim. 3:14, 15.

2. Ania a programa ti panangisuro ti maar-aramid ita?

² Ni Jehova iturturongna ita ti kasayaatan pay laeng a programa ti panangisuro. Kas impadto ni Isaias, minilion a tattao iti intero a lubong ti sumangsang-at iti piguratibo a “bantay ti balay ni Jehova.” (Isa. 2:2) Apay a sumang-attayo sadiay? Tapno agsursurotayo maipapan iti dalan ti Dios, wen, tapno agpaisurotayo ken Jehova! (Isa. 2:3) Kabayatan ti 2010 a tawen serbisio, dagiti Saksi ni Jehova ket nakabusbos iti nasurok a 1.6 bilion nga oras iti panangasaba ken panangisuro kadagiti tattao iti kinapudno a linaon ti Biblia. Malaksid iti dayta, linawas a maipapaay ti naespirituan a panangisuro iti nasurok a 105,000 a kongregasion iti intero a daga, ken mangipabpablaak met ti matalek ken masirib nga adipen kadagiti makaisuro a Nakristianuan a publikasion iti nasurok a 500 a lenguahe.

3. Kasanoka a nagunggonaan a mismo iti edukasion nga ipapaay ni Jehova?

³ Aprobetsarenyo a Naan-anay: Dakkel ti nagunggonatayo iti nadiosan nga edukasion! Naammuantayo nga adda nagan ti Dios ken isu ket maseknan kadatayo. (Sal. 83:18; 1 Ped. 5:6, 7) Naammuantayo dagiti sungbat iti sumagmamano a kapatgan a saludsod iti biag: Apay nga agsagsagaba ken matmatay dagiti tattao? Kasano nga agbalin a naragsak ti biagko? Ania ti panggep ti biag? Inikkannatayo pay ni Jehova iti moral a panangiwanwan a tumulong kadatayo nga ‘agballigi iti dalantayo.’—Jos. 1:8.

4. Ania ti sumagmamano kadagiti panangsanay a mabalin nga aprobetsaren dagiti adipen ti Dios, ken apay nga aramidentayo ti amin a kabaelantayo nga agsursuro manipud ken Jehova?

⁴ Kanayonanna, mangipapaay ni Jehova iti naisangsangayan nga edukasion a tumulong iti adu kadagiti adipenna a mangpalawa iti panagserbida kenkuana. Makitatayo iti panid 4-6 dagiti oportunidad a mabalin nga aprobetsaren dagiti dadduma. Uray no saan nga ipalubos ti kasasaadtayo ti umawat kadagiti nadakamat a pannakasanay, ap-aprobetsarentayo kadi a naan-anay ti nadiosan nga edukasion nga ipalubos ti kasasaadtayo? Parparegtaentayo kadi dagiti agtutubo, a masansan a guyguyugoyen dagiti mannursuro ken dagiti dadduma a mangala iti nangatngato nga edukasion iti lubong, a mangipasdek kadagiti naespirituan a kalat ken mangragpat iti kasasayaatan nga edukasion—ti nadiosan nga edukasion? Ti panangaramid iti amin a kabaelantayo nga agsursuro manipud ken Jehova ket tumulong kadatayo a maaddaan iti naragsak a biag itan ken iti agnanayon a biag iti masanguanan.—Sal. 119:105; Juan 17:3.

Sumagmamano Kadagiti Panangsanay nga Ipapaay ti Organisasion ni Jehova

Panagsursuro nga Agbasa ken Agsurat

Panggep: Mangisuro kadagiti tattao nga agbasa ken agsurat tapno kabaelanda a basaen ken adalen ti Biblia ken tapno maisuroda ti kinapudno kadagiti sabsabali.
Kapaut: Sigun iti kasapulan.
Lokasion: Lokal a Kingdom Hall.
Dagiti Mabalin a Tumabuno: Amin nga agibumbunannag ken interesado a tattao.
Kasano ti Agaplay: Dagiti panglakayen ti mangorganisar kadagiti klase a pagsursuruan nga agbasa ken agsurat sigun iti lokal a kasapulan, ken paregtaenda a tumabuno dagiti amin a mabalin a magunggonaan iti daytoy.

Teokratiko nga Eskuelaan ti Panagministro

Panggep: Mangsanay kadagiti agibumbunannag tapno epektibo ti panangikasaba ken panangisuroda iti naimbag a damag.
Kapaut: Agtultuloy.
Lokasion: Lokal a Kingdom Hall.
Dagiti Mabalin a Tumabuno: Amin nga agibumbunannag ken dagiti dadduma nga aktibo a makitimtimpuyog iti kongregasion, nga umanamong kadagiti pannursuro iti Biblia, ken agbibiag maitunos kadagiti Nakristianuan a prinsipio.
Kasano ti Agaplay: Makisaritakayo iti manangaywan iti Teokratiko nga Eskuelaan ti Panagministro.

Klase a Pagsursuruan iti Ganggannaet a Lenguahe

Panggep: Mangisuro kadagiti agibumbunannag no kasano ti mangikasaba iti naimbag a damag iti sabali a lenguahe.
Kapaut: Uppat wenno lima a bulan. Dagiti klase ket gagangay a maangay kadagiti agsapa ti Sabado iti maysa wenno dua nga oras.
Lokasion: Kaaduanna nga iti asideg a Kingdom Hall.
Dagiti Mabalin a Tumabuno: Dagiti agibumbunannag a nasayaat ti espiritualidadna a mayat a mangasaba iti ganggannaet a lenguahe.
Kasano ti Agaplay: Dagiti klase ket iyurnos ti sanga nga opisina sigun iti kasapulan.

Panagibangon iti Kingdom Hall

Panggep: Mangibangon ken mangtarimaan kadagiti Kingdom Hall. Saan nga eskuelaan daytoy ngem babaen iti daytoy nga urnos, masursuruan dagiti boluntario iti nadumaduma a paglaingan a mausarda a tumulong kadagiti proyekto a panagibangon.
Kapaut: Sigun iti kasasaad ti boluntario.
Lokasion: Sadinoman a nakaitudingan ti Kingdom Hall Construction Desk’s Regional Office. Adda dagiti boluntario a mabalin a maawis a tumulong iti trabaho a panangsaranay iti ad-adayo a lugar a naapektaran iti didigra.
Kualipikasion: Bautisado a kakabsat a lallaki ken babbai, nasigoda man iti daytoy a trabaho wenno saan, ken inaprobaran ti bagi dagiti panglakayen.
Kasano ti Agaplay: Suratanyo ti porma nga Application for Kingdom Hall Construction Volunteer Program (A-25) nga ited ti manangaywan iti sirkito wenno mabalinyo a kiddawen daytoy iti sanga nga opisina.

Pioneer Service School

Panggep: Tumulong kadagiti payunir a ‘naan-anay a mangitungpal iti ministerioda.’—2 Tim. 4:5.
Kapaut: Dua a lawas.
Lokasion: Ikeddeng ti sanga nga opisina; masansan nga iti asideg a Kingdom Hall.
Kualipikasion: Dagiti regular pioneer iti di kumurang a maysa a tawen.
Kasano ti Agaplay: Automatiko a maipasalista dagiti kualipikado a payunir ken pakaammuan ida ti manangaywan iti sirkito.

Bethel Entrants’ School

Panggep: Daytoy nga eskuelaan ket nairanta a tumulong kadagiti kabbaro a Bethelite nga agbalin a naballigi iti panagserbida iti Bethel.
Kapaut: Maysa nga oras iti kada lawas iti unos ti sangapulo ket innem a lawas.
Lokasion: Bethel.
Kualipikasion: Masapul a permanente a miembro ti pamilia ti Bethel wenno agpaut a temporario a boluntario (makatawen wenno napapaut pay).
Kasano ti Agaplay: Automatiko a maipasalista dagiti kualipikado a miembro ti pamilia ti Bethel.

Kingdom Ministry School

Panggep: Tapno masanay dagiti panglakayen ken ministerial nga adipen a mangidaulo ken mangasikaso kadagiti responsabilidadda iti organisasion. (Ara. 20:28) Maang-angay daytoy nga eskuelaan iti tunggal sumagmamano a tawen sigun iti ikeddeng ti Bagi a Manarawidwid.
Kapaut: Kadagiti kallabes a tawen, naikondukta daytoy iti maysa ket kagudua nga aldaw para kadagiti panglakayen ken maysa nga aldaw para kadagiti ministerial nga adipen.
Lokasion: Gagangay nga iti asideg a Kingdom Hall wenno Assembly Hall.
Kualipikasion: Masapul a panglakayen wenno ministerial nga adipen.
Kasano ti Agaplay: Ti manangaywan iti sirkito ti mangawis kadagiti kualipikado a panglakayen ken ministerial nga adipen.

School for Congregation Eldersa

Panggep: Tapno matulongan dagiti panglakayen a mangitungpal kadagiti responsabilidadda iti kongregasion.
Kapaut: Lima nga aldaw.
Lokasion: Ikeddeng ti sanga nga opisina; masansan nga iti asideg a Kingdom Hall wenno Assembly Hall.
Kualipikasion: Panglakayen laeng.
Kasano ti Agaplay: Ti sanga nga opisina ti mangawis kadagiti kualipikado a panglakayen.

School for Traveling Overseers and Their Wivesb

Panggep: Tapno matulongan dagiti manangaywan iti sirkito ken distrito nga agbalin nga ad-adda nga epektibo iti panagserbida kadagiti kongregasion ken tapno ‘makapagtrabahoda a sipipinget iti panagsao ken panangisuro’ ken tapno maipastoranda dagiti adda iti aywanda .—1 Tim. 5:17; 1 Ped. 5:2, 3.
Kapaut: Dua a bulan.
Lokasion: Ikeddeng ti sanga nga opisina.
Kualipikasion: Dagiti manangaywan iti sirkito ken distrito.
Kasano ti Agaplay: Ti sanga nga opisina ti mangawis kadagiti kualipikado nga agdaldaliasat a manangaywan ken kadagiti assawada.

Bible School for Single Brothersc

Panggep: Tapno maisagana dagiti panglakayen ken ministerial nga adipen nga awanan iti asawa kadagiti kanayonan a responsabilidad. Ti kaaduan nga agturpos iti daytoy ket madutokan nga agserbi iti lugar nga addaan iti dakdakkel a panagkasapulan iti nakayanakanda a pagilian. Adda met sumagmamano a madutokan nga agserbi iti sabali a pagilian no ipalubos ti kasasaadda.
Kapaut: Dua a bulan.
Lokasion: Ikeddeng ti sanga nga opisina; masansan nga iti Assembly Hall wenno Kingdom Hall.
Kualipikasion: Saan a naasawaan a kakabsat a lallaki nga agtawen iti 23 agingga iti 62, nasayaat ti salun-atna, ken sidadaan nga agserbi kadagiti kakabsat ken mangyadelantar kadagiti interes ti Pagarian iti sadinoman nga addaan iti panagkasapulan. (Mar. 10:29, 30) Masapul a di kumurang a dua a tawen nga agserserbin kas panglakayen wenno ministerial nga adipen.
Kasano ti Agaplay: No adda kastoy nga eskuelaan iti teritoria ti sanga nga opisina, adda maangay a miting para kadagiti interesado nga agpasalista iti daytoy nga eskuelaan iti asamblea sirkito. Maipaay ti kanayonan nga impormasion kabayatan daytoy a miting.

Bible School for Christian Couplesd

Panggep: Mangipaay iti naisangsangayan a pannakasanay kadagiti pagassawaan tapno naan-anay a mausar ida ni Jehova ken ti organisasionna. Ti kaaduan nga agturpos iti daytoy ket madutokan nga agserbi iti lugar nga addaan iti dakdakkel a panagkasapulan iti nakayanakanda a pagilian. Mabalin nga adda met dagiti madutokan nga agserbi iti sabali a pagilian no ipalubos ti kasasaadda.
Kapaut: Dua a bulan.
Lokasion: Ti umuna a sumagmamano a klase ket maang-angayen idiay Watchtower Educational Center idiay Patterson, New York, U.S.A. Kalpasanna, maangayto daytoy nga eskuelaan kadagiti lugar nga ikeddeng ti sanga nga opisina, gagangay nga iti Assembly Hall wenno Kingdom Hall.
Kualipikasion: Agassawa nga agtawen iti 25 agingga iti 50, nasayaat ti salun-atda, ken sidadaan nga agserbi iti sadinoman nga addaan iti dakdakkel a panagkasapulan ken addaan iti kababalin nga “Adtoyak! Ibaonnak.” (Isa. 6:8) Masapul a di kumurang a dua a tawen nga agassawadan ken di kumurang a diretso a dua a tawen nga agserserbida iti amin a tiempo.
Kasano ti Agaplay: No adda kastoy nga eskuelaan iti teritoria ti sanga nga opisina, adda maangay a miting para kadagiti interesado nga agpasalista iti daytoy nga eskuelaan iti aldaw ti espesial nga asamblea. Maipaay ti kanayonan nga impormasion kabayatan daytoy a miting.

Watchtower Bible School of Gilead

Panggep: Mangsanay kadagiti payunir ken kadagiti dadduma nga agserserbi iti amin a tiempo para iti panagmisionero.
Kapaut: Lima a bulan.
Lokasion: Watchtower Educational Center, Patterson, New York, U.S.A.
Kualipikasion: Agassawa a tallo a tawenen a nabautisaran ken agtawen iti 21 agingga iti 38 idi damo a nangtedda iti aplikasion. Masapul nga ammoda ti agsao iti Ingles, di kumurang a dua a tawen nga agassawadan ken di kumurang a diretso a dua a tawen nga agserserbida iti amin a tiempo. Masapul a nasayaat ti salun-atda. Mabalin met nga agaplay dagiti payunir nga agserserbi iti sabali a pagilian (agraman dagiti misionero ti status-na); agdaldaliasat a manangaywan; Bethelite; ken dagiti nagturpos iti Ministerial Training School, Bible School for Single Brothers, ken Bible School for Christian Couples no kualipikadoda.
Kasano ti Agaplay: Kadagiti napili a sanga nga opisina, adda maangay a miting para kadagiti interesado iti daytoy nga eskuelaan iti kombension distrito. Maipaay ti kanayonan nga impormasion kabayatan daytoy a miting. No awan ti kastoy a miting bayat dagiti kombension iti pagilianyo ket kayatyo ti agaplay, agsuratkayo iti sanga nga opisina para iti kanayonan nga impormasion.

School for Branch Committee Members and Their Wives

Panggep: Tapno matulongan dagiti Komite ti Sanga a mangpasayaat iti panangitungpalda iti trabahoda a mangimaton kadagiti pagtaengan a Bethel, mangasikaso kadagiti banag a mainaig iti serbisio a mangapektar kadagiti kongregasion, mangiwanwan kadagiti sirkito ken distrito kadagiti naituding a teritoriada, kasta met iti panangipatarus, panangimprenta, ken panangitulod kadagiti literatura ken mangiwanwan kadagiti nagduduma a departamento.—Luc. 12:48b.
Kapaut: Dua a bulan.
Lokasion: Watchtower Educational Center, Patterson, New York, U.S.A.
Kualipikasion: Miembro ti Komite ti Sanga wenno Country Committee wenno dagiti nadutokan nga agserbi iti kasta nga annongen.
Kasano ti Agaplay: Ti Bagi a Manarawidwid ti mangawis kadagiti kualipikado a kakabsat ken kadagiti assawada.

a Iti agdama, daytoy nga eskuelaan ket saan pay laeng a maang-angay iti amin a pagilian.

b Iti agdama, daytoy nga eskuelaan ket saan pay laeng a maang-angay iti amin a pagilian.

c Iti agdama, daytoy nga eskuelaan ket saan pay laeng a maang-angay iti amin a pagilian.

d Iti agdama, daytoy nga eskuelaan ket saan pay laeng a maang-angay iti amin a pagilian.