Dua a Sinsilio a Bassit ti Pategna

Ti maysa a napateg a pamay-an a masuportarantayo dagiti interes ti Pagarian ket babaen ti panangted iti kontribusion iti sangalubongan a trabaho a panangasaba. Kasanon no awan ti makukuartatayo?

Naminsan, adda nakita ni Jesus a napanglaw a balo a nangipisok iti dua a sinsilio a bassit ti pategna iti baul ti gameng iti templo. Ti ayatna ken Jehova ti nangtignay kenkuana a mangisakripisio “iti panagkasapulanna, . . . ti isuamin nga adda kenkuana, ti intero a pagbiagna.” (Mar. 12:41-44) Ti panangdakamat ni Jesus iti daytoy ipasimudaagna a ti kontribusion ti balo ket dakkel ti pategna iti imatang ti Dios. Umasping iti dayta, dagiti Kristiano idi umuna a siglo saanda nga imbilang a pribilehio laeng dagiti babaknang a Kristiano ti panangted iti pinansial a suporta iti ministerio. Dinakamat ni apostol Pablo ti ehemplo dagiti taga-Macedonia nga, iti laksid ti “nakaro a kinakurapayda . . . nagpakpakaasida . . . buyogen ti kasta unay a panagdawdawat iti pribilehio a siaasi a panangted.”—2 Cor. 8:1-4.

Gapuna, no ‘dua laeng a sinsilio a bassit ti pategna’ ti kabaelantayo nga ited kas kontribusion, laglagipentayo a no mapagtitipon dagita, dumakkel ti pategna. Ti naimpusuan a panangtedtayo ket makaay-ayo iti naparabur a nailangitan nga Amatayo, ta ti “Dios ayatenna ti naragsak a manangited.”—2 Cor. 9:7.