Agannadkayo No Addakayo iti Ministerio
1. Apay a napateg nga agannadtayo no addatayo iti ministerio?
1 ‘Kas iti karnero iti nagtetengngaan dagiti lobo,’ dagiti adipen ti Dios ket mangaskasaba iti “tengnga ti nakillo ken tiritir a kaputotan.” (Mat. 10:16; Fil. 2:15) Gagangay laengen dagiti damag maipapan iti nariribuk a kagimongan, panangraut dagiti managderraaw, ken panagkidnap, a mangipakita a dagiti tattao ket dumakdakes a dumakdakes. (2 Tim. 3:13) Ania a Nainkasuratan a prinsipio ti mabalintayo nga iyaplikar tapno ‘maipaneknektayo iti bagbagitayo a naannadtayo’ iti ministerio?—Mat. 10:16.
2. Kadagiti ania a kasasaad a nainsiriban a panawan ti teritoria ken mangasaba iti sabali a lugar?
2 Agtignay a Nainsiriban: Ipaganetget ti Proverbio 22:3 a nainsiriban nga ‘aglemmengtayo’ no adda didigra. Nasiputkayo koma! Ti natalged a kasasaad iti aglawlaw ket mabalin a giddato nga agbaliw. Mabalin a makakitakayo kadagiti agsasangpet a polis wenno agkakaribuso a tattao iti kalsada. No dadduma, ballaagandakayo dagiti maseknan a bumalay. Imbes nga agusiosokayo, nainsiriban no pumanawkayon a dagus ket mangasabakayo laengen iti sabali a lugar.—Prov. 17:14; Juan 8:59; 1 Tes. 4:11.
3. Kasano nga agaplikar iti ministeriotayo ti prinsipio ti Eclesiastes 4:9?
3 Agtrabaho a Sangsangkamaysa: “Ti dua nasaysayaat ngem iti maysa,” kuna ti Eclesiastes 4:9. Nalabit nakairuamam ti agmaymaysa a mangasaba, ngem natalged pay laeng kadi dayta ita? Mabalin a natalged kadagiti dadduma a lugar. Ngem kadagiti sabali a lugar, saanen a natalged para kadagiti kakabsat a babbai wenno kadagiti agtutubo ti mangasaba iti binalaybalay nga agmaymaysa, nangruna no sumipngeten. Ipakita dagiti kapadasan a dakkel ti maitulongna ti alerto a kadua. (Ecl. 4:10, 12) Siputanyo dagiti dadduma a kaduayo iti grupo. Iruamyo ti agpakada no pumanawkayon iti teritoria.
4. Kasanotayo a masalakniban ti amin a kameng ti kongregasion?
4 Kas ‘mangbambantay kadagiti kararuatayo,’ responsabilidad dagiti panglakayen ti mangipaay iti praktikal a panangiwanwan maitunos iti kasasaad ti teritoria. (Heb. 13:17) Sigurado a bendisionannatayo ni Jehova no ipakitatayo ti Nakristianuan a kinaemma ken naan-anay a makitinnulongtayo kadagiti panglakayen. (Mik. 6:8; 1 Cor. 10:12) Kas adipen ti Dios, sapay koma ta makaipaaytayo amin iti naballigi a panangsaksi iti teritoriatayo, ngem kanayon nga aramidentayo dayta a siaannad.