Ania ti ‘Panggapuantayo nga Agrag-o’?

1. Ania ti panggapuantayo nga agrag-o iti ngudo ti tunggal bulan?

¹ Iti ngudo ti tunggal bulan ket makiddaw nga itedtayo ti reporttayo iti panagserbi iti tay-ak, ania ti ‘panggapuantayo nga agrag-o’? (Gal. 6:4) Maysatayo man nga special pioneer a mangirepreport iti 130 nga oras iti ministerio wenno agibumbunannag a naaprobaran a mangireport iti 15, 30, wenno 45 minuto, rumbeng a pagrag-oantayo ti amin-kararua a panagserbitayo ken Jehova.—Sal. 100:2.

2. Apay nga aramidentayo ti amin a kabaelantayo nga agserbi ken Jehova?

² Kas Soberano nga Apo iti uniberso, maikari ni Jehova a pangipaayantayo iti amin a kabaelantayo. (Mal. 1:6) Gapu iti ayattayo kenkuana, indedikartayo ti biagtayo a mangaramid iti pagayatanna. Gapuna, iti ngudo ti aldaw wenno bulan, no masiguradotayo nga impaaytayo ti “umuna a bungbunga” ti tiempo, abilidad, ken pigsatayo nga agserbi ken Jehova, adda panggapuantayo nga agrag-o. (Prov. 3:9) Ngem no ibaga ti konsiensiatayo a saantay nga inaramid ti amin a kabaelantayo, masapul a tingitingentayo no kasanotayo a mapasayaat ti panagserbitayo.—Roma 2:15.

3. Apay a saan a nasayaat nga idiligtayo ti maar-aramidantayo kadagiti sabsabali?

³ “Saan nga iti Panangipadis iti Sabali a Tao”: Saan a nasayaat ti panangidilig iti maar-aramidantayo ken ti maar-aramidan dagiti sabsabali wenno ti panangidilig iti maar-aramidantayo ita ken idi kapigpigsaantayo pay. Agbaliwbaliw ti kasasaad ken agduduma ti abilidadtayo. Ti panangipadis, wenno panangidilig, ket masansan a mangituggod iti kompetision wenno pannakarikna iti kinaawan-serbi. (Gal. 5:26; 6:4) Saan a nagidilig ni Jesus. Imbes ketdi, nangted iti komendasion sigun iti kabaelan nga aramiden ti maysa a tao.—Mar. 14:6-9.

4. Ania dagiti napateg a leksion a masursurotayo iti ilustrasion ni Jesus maipapan iti talento?

⁴ Iti ilustrasion ni Jesus maipapan iti talento, ti tunggal trabahador ket immawat iti talento “sigun iti bukodna a kabaelan.” (Mat. 25:15) Idi nagsubli ti apo ket kinomustana ti naaramidanda, nakomendaran dagidiay nagtrabaho a sipipinget sigun iti kabaelan ken kasasaadda ket nakipagrag-oda iti apoda. (Mat. 25:21, 23) No agtalinaedtayo met nga okupado iti trabaho a panangikasaba iti Pagarian, manamnamatayo a maay-ayo ti Dios ken adda panggapuantayo nga agrag-o!