Ania ti Mangtignay Kadatayo a Mangasaba?
1. Ania ti pakainaigan ti ayat iti ministeriotayo?
1 Ti panangikasaba iti naimbag a damag ti Pagarian ti Dios ti kapatgan a trabaho a mabalintayo nga aramiden ita. Kinapudnona, babaen iti daytoy maysa laeng a trabaho, maitungpaltayon ti dua kadagiti kapatgan a bilin—ti panangayat ken ni Jehova ken panangayat kadagiti kaarrubatayo. (Mar. 12:29-31) Ti ayat ket nabileg a puersa a mangtignay kadatayo nga agbalin a naregta a ministro.—1 Juan 5:3.
2. Kasano a ti panangasaba ipakitana ti ayattayo ken ni Jehova?
2 Ayat ken ni Jehova: Ti ayattayo iti kasingedan a Gayyemtayo a ni Jehova ti mangtignay kadatayo a mangidepensa kenkuana. Agarup 6,000 a tawenen nga isu ket padpadaksen ni Satanas. (2 Cor. 4:3, 4) Gapuna, adu ti mamati a ti Dios tutuokenna dagiti managbasol iti umap-apuy nga impierno, nga isu ket paset ti misterioso a Trinidad, ken saan a maseknan kadagiti tattao. Adu pay ketdi ti agkuna nga awan ti Dios. Kayattayo la unay a maammuan dagiti tattao ti kinapudno maipapan iti nailangitan nga Amatayo! Ti kinapingettayo a mangsaksi ket mangparagsak iti Dios ken mangpagura ken ni Satanas.—Prov. 27:11; Heb. 13:15, 16.
3. Kasano a ti panangasaba ipakitana ti ayattayo kadagiti kaarrubatayo?
3 Ayat Kadagiti Kaarruba: No kasabaantayo ti maysa a tao, ipakpakitatayo ti ayattayo kenkuana. Kasapulan unay dagiti tattao ti naimbag a damag iti daytoy nariribuk a tiempo. Adu ti kas kadagiti taga-Nineve idi kaaldawan ni Jonas a “saan a pulos makaammo iti nagdumaan ti makannawanda ken ti makannigidda.” (Jon. 4:11) Ti ministeriotayo ti mangisuro kadagiti tattao no kasano ti agbiag a naragsak ken naballigi. (Isa. 48:17-19) Daytoy ti mangted kadakuada iti namnama. (Roma 15:4) ‘Maisalakanda’ no dumngeg ken yaplikarda dagiti masursuroda.—Roma 10:13, 14.
4. Ania ti saan a pulos a lipaten ni Jehova?
4 Dagiti nasingpet nga annak ikagkagumaanda nga ayaten dagiti dadakkelda iti amin a tiempo saan laeng a no kaano a kayatda nga ipakita ti ayatda kadakuada. Umasping iti dayta, ti nauneg nga ayattayo iti Dios ken kadagiti kaarrubatayo ti mangtignay kadatayo a mangbirok kadagiti gundaway a mangasaba iti amin a tiempo, saan laeng a kadagiti nayiskediul nga aldaw ti panangasaba. Mangasabatayo nga awan sardayna. (Ara. 5:42) Pulos a saan a lipaten ni Jehova ti kasta nga ayat.—Heb. 6:10.