Siasino Dagiti Interesado iti Daytoy?
1. No basaentayo ti kopiatayo a Ti Pagwanawanan ken Agriingkayo! ania ti panunotentayo, ken apay?
1 Ti Pagwanawanan ken Agriingkayo! ket nairanta a para kadagiti tattao iti intero a lubong. Gapuna, nadumaduma dagiti topiko a linaon dagiti artikulo. No basaentayo ti tunggal artikulo iti personal a kopiatayo, panunotentayo no siasino ti mabalin nga interesado iti dayta, ken ikagumaantayo nga itukon ti magasin iti dayta a tao.
2. Ania dagiti topiko kadagiti magasintayo ti mabalin a paginteresan dagiti tattao?
2 Ti kadi kabaruan a Pagwanawanan ilawlawagna ti maysa a topiko iti Biblia a napagsaritaanyo iti katrabahuam iti napalabas? Adda kadi artikulo maipapan iti pamilia a makatulong iti kabagiam? Adda kadi am-ammom nga agplamplano nga agpasiar iti sabali a lugar a naitampok iti Agriingkayo!? Adda kadi dagiti magasin nga agaplikar iti sumagmamano a kita ti negosio wenno ahensia ti gobierno iti teritoriayo? Kas pagarigan, ti magasin a mangilawlawag kadagiti karit a mapaspasaran dagiti natataengan ket mabalin a paginteresan dagiti adda kadagiti nursing homes. Mabalin a paginteresan dagiti ahensia a mangipatpatungpal iti linteg ti magasin maipapan iti krimen.
3. Mangtedkayo iti kapadasan a mangipakita iti kinapateg ti panangitukon kadagiti espesipiko a ruar dagiti magasin kadagiti tattao a mabalin nga aginteres kadagiti linaonna.
3 Resulta: Idi naawat ti agassawa a taga-South Africa ti Oktubre 2011 a ruar ti Agriingkayo! maipapan iti “No Kasano ti Mangpadakkel iti Responsable nga Annak,” tinawaganda ti 25 nga eskuelaan iti teritoriada. Duapulo ket dua ti immawat iti kopia dayta a magasin sa inwarasda kadagiti estudianteda. Adda sabali pay a pagassawaan iti dayta a pagilian a kasta met laeng ti inaramidda ket adu ti naipaimada kadagiti eskuelaan iti teritoriada. Inkeddeng pay ketdi dagiti mannursuro iti maysa kadagita nga eskuelaan nga usaren daytoy a magasin iti linawas a klaseda. Inyestoria daytoy a pagassawaan ti kapadasanda iti manangaywan iti sirkito. Ti manangaywan iti sirkito pinaregtana dagiti kongregasion nga aramidenda met dayta kadagiti eskuelaan kadagiti teritoriada. Nakaawat ti sanga nga opisina iti nakaad-adu a kiddaw para kadagiti kanayonan a magasin isu a kasapulan a mayimprenta manen dayta!
4. Apay nga iwarastayo dagiti magasin iti adu a tattao aginggat’ mabalin?
4 Ilawlawag dagiti magasintayo ti pudpudno a kaipapanan dagiti agdama a pasamak ken iturongna ti atension iti Biblia ken iti Pagarian ti Dios. Iti intero a lubong, dagitoy laeng a magasin ti “mangipabpablaak iti pannakaisalakan.” (Isa. 52:7) Gapuna, iwarastayo dagitoy iti adu a tattao aginggat’ mabalin. Ti nasayaat a pamay-an tapno maaramidtayo dayta ket ti panangisaludsod iti bagitayo, ‘Siasino dagiti interesado iti daytoy?’