Tuladenyo Dagiti Propeta—Oseas
1. Ania ti mabalin a naisaludsodmon iti bagim?
1 ‘Ania dagiti kabaelak nga isakripisio para ken ni Jehova?’ Nalabit naisaludsodmo dayta iti bagim bayat nga ut-utobem ti aglaplapusanan a kinaimbag ken asi ni Jehova. (Sal. 103:2-4; 116:12) Situtulok nga inaramid ni Oseas ti imbilin kenkuana ni Jehova, uray no agkalikagum dayta iti panagsakripisiona. Kasanotay a matulad ni Oseas?
2. Kasanotayo a matulad ti nagsayaat nga ulidan ni Oseas maipapan iti panagtultuloy iti trabaho a panangasaba?
2 Mangasaba iti Nariribuk a Panawen: Kangrunaan a naiturong ti mensahe ni Oseas iti sangapulo-tribu a pagarian ti Israel, a sadiay a ti pudno a panagdaydayaw ket dandanin mapukaw. Inaramid ni Ari Jeroboam II no ania ti dakes iti imatang ni Jehova ken intultuloyna ti panagdayaw iti baka nga inrugi ni Jeroboam I. (2 Ar. 14:23, 24) Iti panagturay dagiti simmaruno nga ari, nagtultuloy a nagrakaya ti espiritualidad ti sangapulo-tribu a pagarian agingga iti pannakadadaelna idi 740 B.C.E. Ngem iti laksid ti panagsaknap ti palso a panagdaydayaw, simamatalek a nagserbi ni Oseas kas propeta iti di kumurang a 59 a tawen. Determinadotayo kadi met nga agtultuloy a mangasaba uray no aleng-aleng wenno bumusor dagiti tattao?—2 Tim. 4:2.
3. Kasano a ti biag ni Oseas ipakitana ti asi ni Jehova?
3 Ipamaysa ti Asi ni Jehova: Binilin ni Jehova ni Oseas a ‘mangasawa iti mannakiabig.’ (Os. 1:2) Naaddaan da Oseas ken ni Gomer iti anak a lalaki. Ngem idi agangay, agparang a naaddaan ni Gomer iti dua pay nga annak a bastardo. Ti kinamasindadaan ni Oseas a mangpakawan iti asawana ipakitana ti naindaklan nga asi ni Jehova iti nasukir nga Israel no agbabawida. (Os. 3:1; Roma 9:22-26) Sidadaantayo kadi a mangisakripisio iti personal a pagimbagantayo tapno maipakaammo ti asi ni Jehova kadagiti nadumaduma a kita ti tattao?—1 Cor. 9:19-23.
4. Ania dagiti sumagmamano a sakripisio a mabalintay nga aramiden para ken ni Jehova?
4 Insakripisio ti dadduma nga adipen ni Jehova ti napintas a trabahoda tapno ad-adu ti panawenda iti ministerio. Adda met dagiti nagtalinaed nga awanan asawa wenno anak tapno mayun-unada ti interes ti Pagarian. No panunotentayo ti biag ni Oseas, mabalin a maibagatayo, ‘Diak kabaelan ti inaramidna.’ Nupay kasta, bayat a dumakdakkel ti apresasiontayo iti di kaikarian a kinamanangngaasi ni Jehova ken no agpannuraytayo iti nasantuan nga espirituna a mangipaay iti bileg, mabalin nga usarennatayo iti pamay-an a saantayo nga ipagarup a kabaelantayo nga aramiden, kas ken Oseas.—Mat. 19:26; Fil. 2:13.