Tuladenyo Dagiti Propeta—Mikias
1. Ania ti nalabit naisaludsod ni Mikias, ngem apay a saan nga ubbaw ti panangaskasabana?
1 ‘Kaano nga agpatingga daytoy a dakes a sistema dagiti bambanag?’ Nalabit naisaludsod met dayta ni propeta Mikas idi ipakpakaammona ti pangngeddeng ni Jehova maibusor kadagiti pagarian ti Israel ken Juda. Ngem saan nga ubbaw ti panangaskasabana. Idi 740 B.C.E., kabayatan ti panagbiag ni Mikias, natungpal ti sinao ni Jehova maibusor iti Samaria. (Mik. 1:6, 7) Kalpasanna, nadadael ti Jerusalem idi 607 B.C.E. (Mik. 3:12) Kasanotay a matulad ni Mikias bayat nga ur-urayentayo ti panangukom ni Jehova iti kaaldawantayo?
2. Kasanotay a maipakita ti kinaanus bayat nga ur-urayentayo ti aldaw ni Jehova, ken apay nga aganustayo?
2 Aganustayo: Insurat ni Mikias: “No maipapan kaniak, ken Jehova nga agtultuloyakto nga agsiput. Ipakitakto ti panagur-uray iti Dios ti pannakaisalakanko.” (Mik. 7:7) Siempre, saan a basta inur-uray ni Mikias ti idadateng ti panungpalan. Nagtalinaed nga okupado kas propeta ni Jehova. Bayat nga ur-urayentayo ti aldaw ni Jehova, nasken met a makumikomtayo “kadagiti nasantuan a panagbibiag ken ar-aramid ti nadiosan a debosion.” (2 Ped. 3:11, 12) Gapu iti kinaanus ni Jehova, addaan dagiti tattao iti gundaway nga agbabawi. (2 Ped. 3:9) Ipapusotayo ngarud ti naipaltiing a balakad a tuladentayo ti kinaanus dagiti propeta.—Sant. 5:10.
3. Apay a nasken nga ikararagtayo ken Jehova nga ipaayannatayo iti nasantuan nga espirituna?
3 Agpannuraytayo iti Bileg nga Ipaay ni Jehova: Nupay narigat ti annongenna, nagpannuray ni Mikias iti bileg nga ipapaay ni Jehova tapno maitungpalna dayta. (Mik. 3:8) Saan a naiparna laeng ti balakad ti Biblia nga agpannuraytayo iti bileg nga ipapaay ti Dios. Sipaparabur nga ikkanna iti bileg dagidiay nabannog tapno maitungpalda dagiti teokratiko nga annongenda. (Sal. 84:5, 7; Isa. 40:28-31) Napasaranyo kadin a mismo daytoy iti panagserbiyo iti Dios? Kanayon kadi nga ikarkararagyo ken Jehova a tulongannakayo babaen ti nabileg a nasantuan nga espirituna?—Luc. 11:13.
4. Ania a nagsayaat nga ulidan ti ipaay kadatayo ti kabibiag ni Mikias?
4 Iti unos ti panagbiagna, impangpangruna ni Mikias ti panangaramidna iti pagayatan ti Dios. Determinado nga agtalinaed a matalek nupay napalikmutan iti kinadakes. Inaldaw met a masubok ti kinatarnawtayo. Pabilgentay ngarud ti determinasiontayo a ‘magna iti nagan ni Jehova a Diostayo agingga iti tiempo a di nakedngan.’—Mik. 4:5.