Saludsod
◼ Ania ti nasken a masursuro dagiti ubbing tapno rumang-ayda iti naespirituan?
Dakkel ti maaramidan dagiti Kristiano a nagannak tapno dumakkel dagiti annakda iti “disiplina ken panangiturong-panunot ni Jehova.” (Efe. 6:4) Kas pagarigan, natakuatan dagiti nagannak a makagunggona ti panangusig iti teksto iti inaldaw a kadua dagiti annakda iti tunggal agsapa. Bayat ti panagdaydayaw ti pamilia ken iti dadduma pay a gundaway, mabalin a buyaen ken pagsasaritaan ti pamilia ti maysa a video, pagsasaritaanda ti espesipiko a material manipud kadagiti artikulo a Saludsod Dagiti Agtutubo, iyaktoda ti maysa a salaysay iti Biblia, wenno agensayoda. Nupay kasta, tapno “rumang-ay iti kinanataengan” dagiti ubbing, masapul a masuruanda met kadagiti naun-uneg a kinapudno iti Biblia.—Heb. 6:1.
Panunotenyo ti isursurotayo kadagiti makasabaantayo iti teritoriatayo. Iti damo a pannakisarita wenno kadagiti panagsarungkar, gagangay nga ikagkagumaantayo ti mangirugi iti panangyadal iti Biblia babaen ti libro nga Ania a Talaga ti Isursuro ti Biblia? No malpastayon nga iyadal dayta a publikasion, isarunotayo ti libro nga Agtalinaedka iti Ayat ti Dios. Apay? Ti libro nga Isursuro ti Biblia ipaayanna dagiti estudiante iti kangrunaan a pannakaammo iti Kasuratan. Ti libro nga Ayat ti Dios isurona kadakuada no kasano nga iyaplikar iti inaldaw dagiti prinsipio iti Biblia. Ti panangusig kadagitoy a publikasion tulonganna dagiti kabbaro a ‘mairamut’ ken Kristo ken ‘mapatibker iti pammati.’ (Col. 2:6, 7) Saan kadi a makagunggona met kadagiti annaktayo dagitoy a material? Nasken a maisuro met kadakuada ti maipapan iti subbot, ti Pagarian, ken ti kasasaad dagiti natay. Masapul a maammuan met dagiti ubbing no apay nga ipalpalubos ti Dios ti panagsagaba ken no ania ti pagilasinan ti maudi nga al-aldaw daytoy a sistema ti bambanag. Rumbeng a kombinsidoda nga adda kadagiti Saksi ni Jehova ti kinapudno. Nasken met a matarusan dagiti ubbing dagiti prinsipio iti Biblia ken no kasano a sanayen “dagiti pannakabalin ti pannakaawatda.” (Heb. 5:14) Siempre, masapul nga ikabilangan dagiti nagannak ti edad ken ti abilidad dagiti annakda nga agsursuro. Nupay kasta, adu nga annak ti makabaelen nga agsursuro kadagiti nauneg a kinapudno iti Biblia uray no ubbingda pay.—Luc. 2:42, 46, 47.
Tapno matulongan dagiti nagannak, addanto maikabil iti jw.org a giya iti panagadal a naibatay iti libro nga Isursuro ti Biblia. Makita dagitoy iti Web site-tayo babaen ti panangi-click iti PANNURSURO TI BIBLIA > TIN-EDYER. Iti masanguanan, addanto kanayonan a giya iti panagadal a naibatay iti libro nga Ayat ti Dios. Siempre, mabalin met nga usaren ti nakaimprenta a bersion dagitoy a libro. Dagiti nagannak ti mangikeddeng no iramanda nga usaren daytoy a material bayat ti panagdaydayaw ti pamiliada, iti panangyadalda iti maysa kadagiti annakda, wenno iti panangsanayda iti anakda nga ag-personal study.