Panangparang-ay iti Abilidadtayo iti Ministerio—Panangsanay Kadagiti Kabbaro

No Apay a Napateg: Dagiti baro nga adalan ni Jesus masapul a sursuruenda a tungpalen ti “amin a bambanag” nga imbilinna, a pakairamanan ti panangisuro iti kinapudno kadagiti sabsabali. (Mat. 28:19, 20) Adu a kabbaro ti agpaspaseten iti Teokratiko nga Eskuelaan ti Panagministro ken mabalin a napadasandan ti nangasaba iti di pormal kadagiti kabagian wenno gagayyemda. Ngem bayat a dumakdakkel ti apresasionda kadagiti maad-adalda ken maammuanda a kayat ni Jehova a mangngegan ti amin a tattao ti naimbag a damag, mabalin nga ibagada a kayatdan ti makikadua kadatayo a mangasaba. (Roma 10:13, 14) Apaman a maaprobaran dagiti kabbaro kas di bautisado nga agibumbunannag, makatulong kadakuada ti nasayaat a pannakasanay tapno ad-adda nga agtalekda iti bagida bayat nga aramidenda daytoy a nagpateg nga addang para iti panagrang-ayda iti naespirituan.—Luc. 6:40.