“These Words . . . Must Be on Your Heart”

Dagiti nagannak ket kasla kadagiti pastor. Masapul nga aywananda dagiti annakda ta nalaka laeng dagitoy a maiwawa ken nalakada a mabikbiktima. (Prov. 27:23) Kasano a maitungpal dagiti nagannak daytoy nga annongen? Masapul a mangilatangda iti oras iti kada aldaw a makisarita kadagiti annakda tapno maammuanda no ania ti linaon ti panunot ken pusoda. (Prov. 20:5) Kasta met, masapul nga agusar dagiti nagannak kadagiti materiales a di mapuoran tapno mapatibkerda ti pammati dagiti annakda. (1 Cor. 3:10-15) Ti video a “These Words . . . Must Be on Your Heart” itampokna ti kinapateg ti regular a panagdaydayaw ti pamilia. Buyaenyo kas pamilia sa pagsasaritaanyo dagiti sumaganad a saludsod.

(1) Ania ti makagapu a napukaw ti pamilia Roman ti panangipamaysada iti atensionda iti naespirituan? (2) Apay a saan a nagballigi ti panangpadas ni Brother Roman a mangirugi iti panagdaydayaw ti pamiliada? (3) Ania ti ibagbaga ti Biblia a kasayaatan nga aramiden tapno naballigi ti panangpadakkel iti annak? (Deut. 6:6, 7) (4) Ania ti makatulong iti nasayaat a komunikasion ti pamilia? (5) Ania dagiti kita ti panagsakripisio a masapul nga aramiden dagiti nagannak para iti annakda? (6) Kasano a nasayaat nga impluensia da Brother ken Sister Barrow iti pamilia Roman? (Prov. 27:17) (7) Ania ti masapul nga aramiden a nasaksakbay ti ulo ti pamilia tapno naballigi ti panagdaydayaw ti pamiliada? (8) Ania ti inaramid ni Brother Roman a nangpasayaat iti kasasaad ti pamiliana? (9) Apay a napateg a masurot ti eskediul ti panagdaydayaw ti pamilia? (Efe. 6:4) (10) Ania dagiti praktikal a pagsasaritaan ken aramiden iti panagdaydayaw ti pamilia? (11) Kasano a nagbalin ni Brother Roman a kalmado ngem natibker iti desisionna idi tultulonganna ni Marcus a mangapresiar iti kinapateg ti panangaramid iti umiso? (Jer. 17:9) (12) Kasano a nakirinnason da Brother ken Sister Roman ken ni Rebecca tapno matulonganda a makaaramid iti umiso a desision mainaig iti pannakirelasionna ken Justin? (Mar. 12:30; 2 Tim. 2:22) (13) Kasano nga impakita da Brother ken Sister Roman ti pammatida idi mangaramidda kadagiti panagbalbaliw iti biagda? (Mat. 6:33) (14) Kasano nga ipagpaganetget daytoy a video ti kinapateg ti panangipaay dagiti ulo ti pamilia iti naespirituan a kasapulan ti pamiliada? (1 Tim. 5:8) (15) Ania ti determinasionyo kas ulo ti pamilia?

PALAGIP KADAGITI ULO TI PAMILIA: Daytoy a moderno a drama ket naiparang iti rehional a kombension idi 2011. Iti daydi a tiempo, adda kadi nakitayo a masapul a parang-ayen iti panagdaydayaw ti pamiliayo? Ita ngay? No kasapulan ti kanayonan a panagbalbaliw, agpatulongkayo ken Jehova tapno makaaramidkayo iti panagbalbaliw para iti manayon a pagimbagan ti pamiliayo.—Efe. 5:15-17.