Tuladenyo Dagiti Propeta—Habakuk
1. Apay a maawatantayo ti narikna ni propeta Habakuk?
1 Bayat a kumarkaro ti kinadakes daytoy a lubong, mabalin a mariknatayo met ti narikna ni Habakuk, a nangisaludsod ken Jehova: “Apay nga ipakitam kaniak ti makapasakit, ket kumitkitaka iti riribuk laeng?” (Hab. 1:3; 2 Tim. 3:1, 13) Makatulong ti panangutob iti mensahe ni Habakuk ken iti matalek nga ulidanna tapno agbalintayo a natibker bayat nga ur-urayentayo ti aldaw ti panangukom ni Jehova.—2 Ped. 3:7.
2. Kasanotayo a maipakita nga agbibiagtayo a simamatalek ita?
2 Agbiag a Simamatalek: Imbes a mariribukan iti kasasaadna, nagtalinaed ni Habakuk nga alerto ken aktibo iti naespirituan. (Hab. 2:1) Naipanamnama iti propeta a tungpalen ni Jehova ti saona iti eksakto a tiempo ken agbiagto daydiay nalinteg gapu iti kinamatalekna. (Hab. 2:2-4) Ania ti kaipapanan dayta kadagiti Kristiano nga agbibiag iti arinunos ti tiempo ti panungpalan? Napatpateg nga agbalintayo a kombinsido nga umay ti panungpalan ngem iti panangammo no kaano ti iyaay dayta. Pammati ti mangtignay kadatayo nga agtalinaed a managbantay ken mangipangpangruna iti ministerio.—Heb. 10:38, 39.
3. Apay a masapul a taginayonen ti rag-o iti panagserbitayo ken Jehova?
3 Agragsak ken Jehova: Inton rauten ti Gog iti Magog ti ili ni Jehova, masubokto ti pammatitayo. (Ezeq. 38:2, 10-12) Ti panaggugubat ket mangyeg iti panagrigat uray kadagiti mangabak. Mabalin nga agkirang ti taraon, mapukaw dagiti sanikua, ken rumigat ti panagbiag. Ania ti aramidentayo no tumaud dagiti pakarigatan? Ninamnama ni Habakuk dagiti pakarigatan, isu nga inkeddengna a taginayonen ti rag-ona iti panagserbi ken Jehova. (Hab. 3:16-19) “Ti rag-o ni Jehova” tulongannatayto met a mangibtur kadagiti suot iti masanguanan.—Neh. 8:10; Heb. 12:2.
4. Ania dagiti panggapuantayo nga agrag-o ita ken iti masanguanan?
4 Dagidiay isalakan ni Jehova iti um-umayen nga aldaw ti panangukomna agtultuloydanto a masursuruan iti daldalan ti Dios. (Hab. 2:14) Adalento met dagiti mapagungar ti maipapan ken Jehova. Uray itan, usarentayo koma ti amin a gundaway a mangipakaammo iti maipapan ken Jehova ken kadagiti nakaskasdaaw nga ar-aramidna!—Sal. 34:1; 71:17.