Panangparang-ay iti Abilidadtayo iti Ministerio—Panangtulong iti Iyad-adalan nga Agdedikar ken Agpabautisar

NO APAY A NAPATEG: Tapno anamongan ni Jehova dagiti mayad-adalan iti Biblia, masapul nga idedikarda ti biagda kenkuana ken agpabautisarda. (1Pe 3:21) No agbiagda maitunos iti dedikasionda, agbalinda a natalged iti naespirituan. (Sal 91:1, 2) Ni Jehova ti pangidedikaran ti maysa iti biagna, saan nga iti tao, trabaho, wenno organisasion. Isu a masapul a masursuro dagiti iyad-adalan nga ayaten ti Dios ken apresiaren dagiti ar-aramidenna.—Ro 14:7, 8.

NO KASANO NGA ARAMIDEN:

• Bayat ti panagadalyo, pagsaritaanyo ti masursuroyo maipapan ken Jehova. Paregtaem ti iyad-adalam nga inaldaw a basaenna ti Biblia ken kanayon nga agkararag ken Jehova.—1Te 5:17; San 4:8

• Paregtaem ti iyad-adalam a pagbalinenna a kalat ti agdedikar ken agpabautisar. Tulongam met a mangaramid kadagiti simple a kalat, kas iti panagkomento iti gimong wenno panangasaba iti kaarruba ken katrabahuan. Laglagipem a saan a pilpiliten ni Jehova ti asinoman nga agserbi kenkuana. Ti panagdedikar ket personal a desision.—De 30:19, 20

• Tignayem ti iyad-adalam a mangaramid kadagiti kasapulan a panagbalbaliw tapno maay-ayona ni Jehova ken makualipikar nga agpabautisar. (Pr 27:11) Gapu ta mabalin nga adda dagiti nairamut a kababalin ken ugali ti maysa nga iyad-adalan, masapul nga agtultuloy a matulongan tapno maikkatna ti daan a personalidad ket suktanna dayta iti baro. (Efe 4:22-24) Iyestoriam wenno ipabasam kenkuana dagiti artikulo iti serye ti Pagwanawanan a “Ti Biblia Balbaliwanna ti Biag”

• Iyestoriam ti ragsakmo iti panagserbim ken Jehova.—Isa 48:17, 18