Agbalin a Naragsak iti Panangikasaba iti Naimbag a Damag

Nariknam kadin a narigat ti mangasaba? Mabalin a wen ti sungbat ti adu kadatayo. Apay? Baka adu ti bumusbusor ken saan nga interesado iti teritoriatayo wenno mabutengtayo a makisarita kadagiti ditay am-ammo. Sigurado a dagita ti mabalin a mangkissay iti rag-otayo. Ngem naragsak ti Dios a daydayawentayo ket kayatna a naragsaktayo nga agserbi kenkuana. (Sal 100:2; 1Ti 1:11) Ania ti tallo a nasayaat a rason nga agbalintayo a naragsak iti panangasaba?

Umuna, maipapan iti namnama ti ikaskasabatayo. Agkudkudrep ti namnama ti adu ita ngem mabalintayo a punnuen ti pusoda iti “naimbag a damag ti maysa a banag a nasaysayaat.” (Isa 52:7) Mabalin met a mapno ti pusotayo iti rag-o gapu iti naimbag a damag maipapan iti Pagarian ti Dios. Sakbay a mangasabatayo, utobentayo dagiti bendision nga iyegto ti Pagarian ti Dios ditoy daga.

Maikadua, ti naimbag a damag ket mangyeg iti pisikal ken naespirituan a pagimbagan kadagiti tattao. Masursuroda a panawan dagiti makadangran nga aramid ket maaddaanda iti namnama a biag nga agnanayon. (Isa 48:17, 18; Ro 1:16) Kasla makiramramantayo iti search-and-rescue a trabaho. Saan man a kayat ti dadduma ti agpatulong, itultuloytayo latta a sapulen dagidiay mayat.—Mt 10:11-14.

Maikatlo ken ti kapatgan, maidaydayaw ni Jehova iti panangasabatayo. Ipatpategna unay ti trabahotayo a panangsaksi. (Isa 43:10; Heb 6:10) Maysa pay, sipaparabur nga ipapaayna ti nasantuan nga espirituna tapno maibanagtayo daytoy a trabaho. Ipakaasitayo ngarud ken Jehova a maaddaantayo iti rag-o, nga ibunga ti espirituna. (Ga 5:22) Babaen iti tulongna, maabaktayo dagiti pakaringgorantayo ken tumuredtayo a mangasaba. (Ara 4:31) Isu nga aniaman ti reaksion dagiti adda iti teritoriatayo, naragsaktayo latta iti annongentayo a mangasaba.—Eze 3:3.

BUYAEN TI VIDEO A PABARUEM TI RAG-OM BABAEN ITI PANAGADAL KEN PANAGUTOB, SA SUNGBATAN DAGITOY A SALUDSOD:

• Apay a masapul nga ipangpangrunatayo ti personal a panagadaltayo uray no adu nga oras a mangaskasabatayo iti binulan?

• Kasano a matuladtayo ni Maria?

• Kaano nga ut-utobem ti Sao ti Dios?

• Ania ti mangparparagsak kenka no ikaskasabam ti naimbag a damag?