Usaren Dagiti Video a Mangisuro Kadagiti Iyad-adalanyo iti Biblia

Makatulong dagiti visual aid tapno maala ti atension ti agbuybuya ken matulongan a mangtarus ken manglagip iti naadalna. Nagusar ti Naindaklan nga Instruktortayo a ni Jehova kadagiti visual aid tapno mangisuro kadagiti napapateg a leksion. (Ge 15:5; Jer 18:1-6) Kasta met ti inaramid ti Naindaklan a Mannursuro a ni Jesus. (Mt 18:2-6; 22:19-21) Kadagiti napalabas a tawen, ti video ket maysa a klase ti visual aid a napaneknekanen a dakkel ti maitulongna. Us-usarem kadi a naimbag dagiti video no isursurom dagiti iyad-adalam iti Biblia?

Adda 10 a video a naisagana a tumulong kadatayo a mangisuro kadagiti leksion iti broshur a Naimbag a Damag Manipud iti Dios. Kaaduanna a ti paulo ti tunggal video ket adda koneksionna iti maysa kadagiti saludsod a napuskol ti pannakaisuratna a masarakan iti broshur. Ti digital a bersion ket addaan kadagiti link a mangipalagip kadatayo no kaano nga ipabuya ti tunggal video. Adda met dagiti video a makatulong kadagiti nagduduma a publikasion a maus-usar a pangyadal a masarakan iti Toolbox iti Panangisuro.

Adda kadi ilawlawagmo a maysa a topiko maipapan iti Biblia a mabalin a narigat a maawatan ti iyad-adalam? Wenno adda kadi pakasuotanna? Mangbirokka iti video iti jw.org® ken JW Broadcasting® a makatulong kenkuana. Mabalinyo a buyaen a dua ti maysa kadagita sa pagsaritaanyo.

Binulan nga adda baro a video a mairuar. Bayat a buybuyaem dagita, panunotem no kasanom nga usaren dagita no mangisuroka.