Ipategmo ti Relasionmo ken Jehova

Adda espesial a pribilehio dagiti Saksi ni Jehova. Kas dedikado ken bautisado a Kristiano, itultuloytayo a paunegen ti relasiontayo iti Kangatuan nga Apo Jehova. Inyasidegnatayo kenkuana babaen ti Anakna. (Jn 6:44) Dengdenggenna dagiti kararagtayo.—Sal 34:15.

Kasanotayo a maprotektaran ti napateg a relasiontayo iti Dios? Ti maysa a pamay-an ket ditay tultuladen ti basol nga inaramid dagiti Israelita. Di nagbayag kalpasan a nakitulagda ken Jehova, nangaramidda iti balitok a sinan-urbon a baka ket nagdaydayawda iti dayta. (Ex 32:7, 8; 1Co 10:7, 11, 14) Isaludsodtayo iti bagitayo: ‘Ania ti aramidek no maipasangoak iti sulisog? Makita kadi iti aramidko nga ipatpategko ti relasionko ken Jehova?’ Makatulong ti nauneg nga ayat iti nailangitan nga Amatayo tapno maadaywantayo dagiti banag a kagurana.—Sal 97:10.

BUYAEN TI VIDEO A PROTEKTARAM TI RELASIONMO KEN JEHOVA (COL 3:5) SA SUNGBATAN DAGITOY A SALUDSOD:

• Ania ti kinaagum?

• Apay a masapul a laksidentayo ti kinaagum ken idolatria?

• Ania ti pagnaigan ti pannakikamalala ken idolatria?

• Apay a dagiti kakabsat nga addaan iti responsabilidad iti organisasion masapul a siguraduenda a maas-asikasoda ti kasapulan dagiti assawada?