Usaren ti Agbiagka a Naragsak iti Agnanayon! a Mangpadakkel iti Pammati ken Jehova ken ni Jesus

Tapno maparagsak ti Dios, masapul a patanoren dagiti iyad-adalan ti Biblia ti nabileg a pammati. (Heb 11:6) Mabalintay nga usaren ti libro nga Agbiagka a Naragsak iti Agnanayon! a mangdanon iti pusoda. Daytoy a pagadalan a libro ket naglaon kadagiti kangrunaan a teksto, lohikal nga argumento, epektibo a salsaludsod, mangtignay iti puso a video, ken napipintas nga artwork. No tulongantayo dagiti iyad-adalantayo a mangipakita kadagiti Nakristianuan a kualidad ket maaddaanda iti nadekket a relasion iti Dios, agibangbangontayo babaen kadagiti saan a mauram a materiales.​—1Co 3:12-15.

Para iti dadduma, kasla imposible ti makigayyem iti Dios a dida makita. Isu a masapul a tulongantayo ida a maaddaan iti pammati iti naayat a personalidad ni Jehova.

BUYAEN TI VIDEO NGA USAREN TI “AGBIAGKA A NARAGSAK ITI AGNANAYON!” A MANGPADAKKEL ITI PAMMATIDA KEN JEHOVA, SA SUNGBATAN DAGITOY:

• Kasanotayo nga ammo a nagsagana a naimbag ti sister para iti panagadal?

• Kasanona nga inusar ti sumagmamano a napili a naimbag a kanayonan a saludsod tapno mayebkas ti iyad-adalanna ti pampanunoten ken riknana maipapan iti Isaias 41:10, 13?

• Ania ti epekto ti video ken dagiti teksto iti iyad-adalanna?

Saan a maawatan ti adu a tattao ti subbot wenno saanda nga ibilang a personal a regalo ti Dios dayta kadakuada. (Ga 2:20) Isu a masapul a tulongantayo ida a maaddaan iti pammati iti daton a subbot ni Jesus.

BUYAEN TI VIDEO NGA USAREN TI “AGBIAGKA A NARAGSAK ITI AGNANAYON!” A MANGPADAKKEL ITI PAMMATIDA KEN JESUS, SA SUNGBATAN DAGITOY:

• Kasanotayo nga ammo a nagsagana a naimbag ti brother para iti panagadal?

• Kasanona nga inusar ti maitutop nga impormasion iti seksion nga “Agdiskobreka Pay” tapno matulonganna ti iyad-adalanna?

• Apay a napateg ti panagkararag para iti mayad-adalan?