PANAGBIAG KAS KRISTIANO

Nakasaganaka Kadin iti Krisis ti Ekonomia?

Saantayo a makigtot no dagiti pasamak iti lubong ket agresulta iti problema iti ekonomia. Apay? Gapu ta agbibiagtayon iti maudi a paset ti maudi nga al-aldaw ken pakdaarannatayo ti Biblia a ditay agtalek kadagiti “di agpaut a kinabaknang.” (1Ti 6:17; 2Ti 3:1) Ania ti masursurotayo iti ulidan ni Ari Jehosafat maipapan iti panagsagana para iti krisis ti ekonomia?

Nagtalek ni Jehosafat ken Jehova idi pinangtaan dagiti kabusor a nasion. (2Cr 20:9-12) Nangaramid met kadagiti praktikal nga addang a mangisagana iti nasion kas iti panangpaderna kadagiti siudad ken nangikabil kadagiti kampo ti armada. (2Cr 17:1, 2, 12, 13) Kas ken Jehosafat, nasayaat nga agtalektayo ken Jehova ken mangaramidtayo kadagiti praktikal nga addang kadagiti narigat a tiempo.

ANIA TI ARAMIDENTAYO TAPNO MASAGANAANTAYO TI KRISIS TI EKONOMIA?

Isaganam ti espiritualidadmo: Agbalinka a kontento, ken pabilgem ti panagtalekmo iti pannakabalin ni Jehova a mangipaay iti inaldaw a kasapulam. (Mt 6:26; 1Ti 6:8) Determinadoka koma a di mangikompromiso kadagiti prinsipio ti Biblia tapno laeng maalam dagita a kasapulan. (Ro 2:21) Panunotem no kasanoka a makaala iti naespirituan a taraon no awan ti koriente wenno Internet. Mangidulinka iti sumagmamano a nayimprenta a publikasion, ken no posible, nasaksakbay a mangi-download kadagiti elektroniko a publikasion.

Isaganam ti material a kasapulam: Saanka unay nga utang nga utang ken kissayam dagiti di nasken a paggastuan sakbay a tumaud dagiti problema iti ekonomia. (Pr 22:7) No posible, mangidulinka iti kalkalainganna a suplay ti makan ken dadduma pay a napateg a bambanag. Dadduma ti mabalin nga agmula iti natnateng ken dadduma pay tapno makainutda iti kuarta.

BUYAEN TI VIDEO A NAKASAGANAKAYO KADI NO DUMTENG TI DIDIGRA? SA SUNGBATAN DAGITOY:

Eksena iti video a “Nakasaganakayo Kadi No Dumteng ti Didigra?” Makita iti bassit a ladawan ti maysa a Biblia, go bag ken selpon, ken dagiti boluntario iti konstruksion.

Ania ti aramidentayo tapno masaganaantayo ti didigra?

Ti sungbatmo

Eksena iti video a “Nakasaganakayo Kadi No Dumteng ti Didigra?” Tumultulong dagiti kakabsat iti panangsaranay babaen ti trabaho a panagibangon ken panangidiskarga kadagiti materiales iti maysa a truck.

Kasanotayo a makapagsagana a tumulong iti dadduma?

Ti sungbatmo