Usarem ti JW.ORG Home Page iti Ministeriom

Ti home page ket addaan kadagiti artikulo ken video a nadisenio a mangala iti interes dagiti napudno ti panagpuspusona a tattao. (Ara 13:48) Kaaduanna nga itampokna dagiti topiko a linaon dagiti damag wenno pampanunoten ken pagsasaritaan dagiti tattao.

Kasanom a mausar ti jw.org home page iti ministeriom?

• Regular nga itsekmo ti website. Kitaem ti naitampok nga artikulo ken panunotem no kasanom a mausar dayta a tumulong iti maysa nga interesado. (Tapno makitam ti dadduma pay a naitampok iti home page, i-click-mo ti “Kitaen ti Dadduma Pay.”) No updated-ka iti linaon ti website, kanayon nga adda baro nga ideya a mausarmo iti ministeriom.

• Usarem dagiti artikulo ken video a naitampok iti home page a mangirugi iti saritaan. Makatulong dagitoy a material tapno adda ideyatayo no ania ti pampanunoten dagiti tattao iti teritoriatayo.

• Ipakitam kadagiti tattao ti home page. Itampokmo dagiti espesipiko a topiko, ken ipakitam no kasano nga usaren ti website.

• Mangi-share-ka iti link. Adda dagiti tattao a saan a mayat a makisarita kadatayo iti personal, ngem kayatda a bisitaen ti website-tayo. Isu a saanka nga agkedked a mangi-send kadagiti interesado iti link ti home page wenno iti espesipiko nga artikulo wenno video a naitampok sadiay.