PANAGBIAG KAS KRISTIANO
Isalakan ni Jehova Dagidiay Nadudog ti Espirituda
Amintayo ket malidayan no dadduma. Ngem dina kayat a sawen a nakapuytayon iti naespirituan. Ibaga ti Biblia nga uray ni Jehova malidayan met no dadduma. (Ge 6:5, 6) Ngem kasanon no masansan wenno kanayon a sobra ti lidaytayo?
Agpatulongka ken Jehova. Interesado unay ni Jehova iti mental ken emosional a salun-attayo. Ammona no naragsak ken no nalidaytayo. Maawatanna ti pampanunoten ken rikriknatayo. (Sal 7:9b) Kapatgan iti amin, ipatpategnatayo ni Jehova ken matulongannatayo a manglaban iti kinaliday wenno uray ti depresion.—Sal 34:18.
Aywanam ti mental a salun-atmo. Maapektaran dagiti negatibo nga emosion ti kinaragsaktayo kasta met ti panagdaydayawtayo. Gapu iti dayta, nasayaat no saluadantayo ti pusotayo, ti intero a makin-uneg a kinataotayo a pakairamanan ti pampanunot ken rikriknatayo.—Pr 4:23.
BUYAEN TI VIDEO A TAGTAGIRAGSAKEN DAGITI KAKABSATTAYO TI TALNA ITI LAKSID TI DEPRESION, SA SUNGBATAN DAGITOY:
Ania dagiti praktikal a banag nga inaramid ni Nikki tapno maibturanna ti depresion?
Apay a narikna ni Nikki a kasapulanna ti agpadoktor?—Mt 9:12
Ania dagiti inaramid ni Nikki a mangipakita nga agtaltalek iti tulong ni Jehova?